Ноокат районундагы Кара-Таш айыл өкмөтү райондун борборуна жакын аймакта жайгашкан. Калкынын саны — 16224кө жетет. Кара- Таш жана Нойгут айылдарынан турат. Мында жашаган калктын көпчүлүгү дыйканчылык жана мал чарбачылык менен алектенишет. Ал эми жеке ишкерлер болсо дүкөн ачышып базарларда соода-сатык иштерин жүргүзүшөт.
Кара-Таш айыл өкмөтүнүн аймагында таш майдалоочу жана бетон плита чыгаруучу ишканалар иштейт. Андан сырткары, кыш заводу, 10 жыгач тилүүчү ишкана 3 пластик чыгаруучу ишкана, 18 азык-түлүк соода дүкөндөрү бар. Айылдагы жаштар жумушка тартылып иш орду камсыздалган.
Кара-Таш айыл өкмөтүн Кааров Батырбек Дыйканбаевич жетектеп келе жатат. Жамааты менен биргеликте айыл аймагындагы калктын көйгөйлүү маселелерин биргеликте чечүүгө аракеттенет. Өз кесибин мыкты билген кесипкөй адистер эмгектенишет. Айыл өкмөтүнүн башчысынын орун басары Айгүл Орунбаева, жооптуу катчы Жазгүл Закирова, Нойгут айылынын айыл башчысы Аслан Кудайбердиев, Кара-Таш айылынын айыл башчысы Абдыракман Осмонов көп жылдык иш тажрыйбасы бар кызматкерлер. Ошондой эле Аксакалдар соту, Аялдар Кеңешинин төрайымы, аймактык тескөөчүлөр, Айылдык Кеңештин депутаттары менен биргеликте иш алып барышат.
Жергиликтүү кеңеште Жобо кабыл алынып, ошонун негизинде айылдын имамдары менен биргеликте аш- тойлордо ысырапкерчиликти жоюу боюнча алдын-алуу иштери жүргүзүлөт. Маркумду акыркы сапарга узатуу Жобого ылайыктуу болот. Коопсуздукту сактоодо да мектептер менен ата-энелердин ортосунда мезгил-мезгили менен жыйындар өткөрүлүп турулат. Айыл аймагындагы № 20 Үй-бүлөлүк дарыгерлер тобуна айыл өкмөтүнүн бюджетинин эсебинен капиталдык ремонттоого акча каражаты бөлүнүп берилди. Медициналык кызматкерлер тарабынан эмдөө иштери ийгиликтүү аткарылууда. Социалдык жактан аз камсыз болгон үй-бүлөлөргө, мүмкүнчүлүгү чектелгендерге, жалгыз бой энелерге жергиликтүү бюджеттин эсебинен акча каражаты бөлүнүп берилди.
Билимкана биринчи орунда
2022-2023-окуу жылында билим берүү тармагында жалпы республикалык тестирлөөдө “Ноокат-Билимкана жатак лицейинин окуучулары жогорку баллды камсыз кылышты. Жогорку 207 балл, орточо балл- 170, төмөнкү балл — 105ди түздү. Орто мектептерден Чечме-Сай орто мектебининбир бүтүрүүчүсү 185 баллды алып, райондогу мектептер арасында өткөрүлгөн сынакта 2-орунга ээ болду.
Быйылкы жылы “Ноокат Билимканасы” жатак- лицейинин 9 окуучусу “Алтын тамга” артыкчылык аттестатын алып, окуучулардын саны боюнча өлкөдө биринчи орунду камсыздашты. Олимпиаданын республикалык туруна “Ноокат-Билимкана- жатак лицейинин 6 окуучусу катышып, дүйнөлүк олимпиадага бир окуучу катышууга жолдомо алды. Чыгымдар жергиликтүү бюджеттин эсебинен төлөнүп берилди. Айыл өкмөтүнүн аймагындагы Нойгут орто мектебинин окуучулары шахмат оюну боюнча облустук турда биринчи орунду алышып, республикалык турга катышып келишти. Үчүнчү орунду болсо “Жаш таланттар” алышты. Лицейге 10 даана компьютер алууга, Камчы Жунусов, Абдыманап Мамыров, Чечме- Сай жана Нойгут орто мектептеринин ашканасынын айланасын тосууга, жарыктандырууга айыл өкмөтүнүн жетекчилиги тарабынан акча каражаты бөлүнүп берилди.
Инвестиция тартуу жана билимди колдоо жылы
2023- жыл Кара-Таш айыл өкмөтү тарабынан “Инвестиция тартуу жана билимди колдоо жылы” деп жарыяланган. Жарыялангандын негизинде айыл өкмөтүнүн аймагындагы билим берүүчү мекемелерде алгылыктуу иштер аткарылды. Айыл аймагында 5 орто билим берүүчү мектеп, 6 балдар бакчасы бар. Быйылкы жылы А. Мамыров атындагы орто мектебин жаңыдан куруу үчүн сметалык баасы 60 млн. сомдук 375 орундуу мектеп курулуп, пайдаланууга берилди.
Ушул эле Кара-Таш айылынын ишкери Закиров Шавкат Закировичтин демөөрчүлүгү менен “Бурабия эне” атындагы 100 орундуу балдар бакчасы курулуп, мамлекеттин карамагына өткөрүлүп берилди. Ошондой эле жергиликтүү бюджеттин жана жамааттын эсебинен “Мээр Башат” балдар бакчасынын имараты курулуп бүтүп, пайдаланууга тапшыруу алдында турат. Республикалык бюджеттин эсебинен Камчы Жунусов атындагы орто мектеби капиталдык өңдөп- түзөөдөн өткөрүлдү.
2023- жылда инвестиция тартуу боюнча Араб фонду менен биргеликте иштешишип, 100 млн. сомдук инвестиция тартышты. Андан тышкары, Капчыгай айылынын элине суу чыгаруу үчүн 90 млн. сомдук иш- кагаздарын даярдашты. 20 км. аралыкка суу тартылып калса, 300 га. аянтка суу жеткирилет дейт, айыл өкмөтүнүн башчысы Б. Кааров.
Таштандыларды жол боюна таштабоо, айлана-чйрөдөгү тазалыкты сактоо боюнча да иштер жүргүзүлүүдө. Айыл өкмөтүнүн алдында муниципалдык ишкана түзүлгөн. Айыл өкмөтүнүн эсебинен 65 даана урналар айыл ичине коюлду. Айыл ичиндеги калктын жашоо-турмушун жакшыртуу үчүн жол боюна каз-катар столбалар орнотулуп, түнкүсүн электр энергиясы менен жарыктандырылды. Жергиликтүү бюджеттин эсебинен электр мамычалары сатылып алынып, электр энергиясы менен элди камсыздашты. Айыл ичиндеги жолдорго шагыл төгүлүп, асфальттоо иштери жүргүзүлдү. Нойгут айылынын көчөлөрүнө республикалык жана жергиликтүү бюджеттин эсебинен акча каражаты сарпталып, 3, 5 км. Аралыка шагыл төгүлүп, жолдорго асфальт бастырылды.
Азыркы учурдагы элдин эң көйгөйлүү маселелеринин бири – жер бөлүнүп берилсе, там салуу зарылдыгы турат. Кара-Таш айыл өкмөтүндө 3000 (үч миңден) ашуун жарандын арызы бар. Бул маселе боюнча Кыргыз Республикасынын Айыл-чарба министрлигине кат жиберилген. Айыл өкмөтүнүн жетекчилиги тарабынан Азык-түлүк программасы менен иштешип, жергиликтүү элге ун, май берилди. Андан башка ЮСАИД Эл аралык уюму менен “Жигердүү жарандар” долбоору менен биргеликте иш алып баруу үчүн иш-кагаздарын даярдашууда. Жергиликтүү бюджеттин эсебинен Коен-Дөбө айылына 2 км. 300 метр чакырымга чейин сугат суу жеткирилди.
Кара-Таш айыл өкмөтүнүн аймагындагы калктын 95 пайызы таза суу менен менен камсыздалган. Ал эми жаңы конуштагы жашаган элге жергиликтүү бюджеттин эсебинен скважина казылып, пайдаланууга берилүү алдында турат.
2024-жылга карата бир ФАП, бир балдар бакчасын салуу, ички жолдорду асфальттоого карата иш-пландары каралууда.
Б.Ысакова