[cmsmasters_row][cmsmasters_column data_width=»1/1″][cmsmasters_text]
Кыргыз Республикасынын Президенти Садыр Жапаров 19-сентябрда, Нью-Йорк шаарында (АКШ) өтүп жаткан БУУнун Башкы Ассамблеясынын 78-сессиясынын алкагында Тажикстан Республикасынын Президенти Эмомали Рахмон менен жолугушту. Бул тууралуу КР Президентинин маалымат кызматынан кабарлашты.
Маалыматка ылайык, өлкө лидерлери кыргыз-тажик эки тараптуу жана көп тараптуу кызматташуунун артыкчылыктуу багыттарын жана келечегин талкуулашты.
Садыр Жапаров менен Эмомали Рахмон кыргыз-тажик мамлекеттик чек арасын делимитациялоо жана демаркациялоо маселелерине өзгөчө көңүл буруп, башка темалар боюнча да пикир алмашты.
Ушул жылдын 15-сентябрында КР УКМК төрагасы Камчыбек Ташиев Баткенде журналисттердин суроолоруна жооп берип жатып, «кыргыз бийлиги чек ара боюнча жаңы документтерди тапканын, көптөгөн жер коңшу өлкөгө өтүп кеткенин ошол кагаздардын негизинде аныктап бере аларын» айткан жана «Тажикстан Кыргызстанга карата айрым чек ара дооматтарынан баш тартпаса, кыргыз тарап тарыхый документтердин негизинде коңшу өлкөгө укуктук жактан доомат койсо болорун» билдирген.
Буга байланыштуу Кыргызстандын Тажикстандагы элчиси Эрлан Абдылдаев 16-сентябрда бул өлкөнүн Тышкы иштер министрлигине чакырылган.
Ал арада Орусия эки мамлекетти чек араны тактоо маселеси боюнча кескин билдирүүлөрдөн жана шашылыш кадамдардан алыс болууга чакырды. Анда орус тарап бардык карама-каршылыктарды эки тараптуу өкмөттөр аралык комиссиянын алкагында гана саясий-дипломатиялык ыкмалар менен чечүүгө чакырган. Ошондой эле эки өлкөнү Орусиянын стратегиялык өнөктөштөрү экенин белгилеп, Жамааттык коопсуздук келишим уюмуна мүчө мамлекеттердин пикир келишпестигине жол бербөө жана жана аймактагы туруктуулукту сактоого кызыкдар экенин айткан.
Эске салсак, Кыргызстандын Тажикстан менен болгон чек арасы 980 чакырым. Анын 664 чакырымы чечилип, калган 300 чакырымдай аралык такталбай келет. Бул – эң негизги делген калктуу пункттар, суулуу аймактар. Ал эми чечилген жерлер эл жашабаган тоолуу аймактарга кирет. Ушул тапта эки өлкөнүн атайын комиссиялары тактала элек тилкелер боюнча сүйлөшүүлөрдү жүргүзүп жатат.
[/cmsmasters_text][/cmsmasters_column][/cmsmasters_row]