Аңгеме
Мектептин алыс жайгашкандыгынан улам Бекжан күн сайын калаадагы каттамдардагы автоунааларга чыгууга туура келет. Жөө барайын десе жаз менен күздө күн ысык, ал эми кышындасы аба ырайы суук. Аргасыздан автоунаа күтөт. Аялдамага келүү үчүн да жарым чакырым жол жүрөт. Аба ырайы ачык кезде “жолоочунун жолдогусу жакшы” деп коюп, чоӊ жолдун четиндеги жөөжол менен жөнөйт.
Жашаган үйү мектептен алысыраак экенине өкүнбөйт. Бирок каттамдагы бир айдоочунун пейили үчүн ачууланып арман кылат. Ал айдоочу аялдамада жолакыны толук төлөй турган жүргүнчү байкалбаса мектеп окуучулары чыгып албаш үчүн токтобой өтүп кетет. Ал тургай ичиндеги түшө турган жүргүнчүлөрдү да атайын бир кыйла узап барып токтоп түшүрөт. Жүгүрүп барып чыгып алалы деген балдар жетейин дегенде эшигин тартып жаап, катуу жүрүп кетип калат. Жаанда, ысыкта, суукта автоунаа күткөн балдар мостоё түшүп аргасыз жөө жөнөйт. Ушул айдоочуну башка шериктери тартипке чакырып койсо жакшы эле деп ойлонот. Башкалар аны кайдан билсин.
Булар тууралуу Бекжан менен баарлашып олтуруп калдык. Көкүрөгү ызага толгон абалда сүйлөп берип жатты:
-Бирде бир аксакал киши байкап калып, тилдеп жатып кайра токтотуптур. Ичинде мурунку аялдамадан чыккан досум бар экен эле, аксакалдын тилдеп токтоттурганын ошол айтты. Биз чуркап барып чыктык. Аксакал дале насаатын айтып жатты:
-Мындай кылбай жүргүн, уулум. Балдарга мамиле жылуу болмой сайын келечекке жылуу мамиле кыла албайбыз.
-Түшүнсөӊүз, мага бензинди бирөө акысыз куюп бербейт. Окуучулар толуп алышат да, жол акы төлөөчүлөр чыкпай коюшат. Машинам бузулса булар оӊдоп бермек беле. Биз да бала-чака багалы деп таӊ заарда туруп, ушинтип тытынып иштеп жатабыз. Минтип курулай уруша бербеӊиз.
-Тытынып иштегениӊ айып эмес. Жараткан эмгегиӊе жана албетте ниетиӊе жараша ырыскы, дөөлөт берет. Ойлонуп көрүп, пейилиӊди оӊдой көр, уулум. Жек көрүп айыптаба, биздейлер айтпаса ким айтат?!
Кабагын салган айдоочу лам дебеди. Аӊгыча кийинки аялдамалардан жаӊы жүргүнчүлөр чыгып, элдерге аралашып мурунку кеп токтоду. Тилекке каршы айдоочунун жаман адаты калган жок. “Мен мындай айдоочу болбоймун” деп чоӊоюп жаттык.
Көӊүл коюп угуп олтуруп көзүмө жаш келди. Жол жээгинде баратсак, дөӊгөлөктөрү менен чыланы чачыратып машинасын айдап өтүп кеткен айдоочуну кандай жек көрүп тилденебиз… Жаӊы кийим, бара турган жагыбыз белгилүү, ошончо кишилерге кездешебиз… Элестетип көрүп ачуубузду токтото албай калабыз.
*
Убакыт учуп, жылдар жылас болуп жатты. Ошол окуялар эсинде калып чоӊойгон Бекжан ошол эле калаадагы жогорку окуу жайына студент болду. Мезгилден ыкчам эч нерсе жок белем, колуна диплом алып чыгып, жумушка орношту. Мамлекеттик практика учурунда көнгөн жерине чакырып калып, милиция кызматын аркалап калды. Эч эсинен кетпеген маанилүү окуялардын баш сабында мектеп окуучуларын атайлап калтырып кетчү айдоочунун адаты турчу. Акырындык менен анын үй-бүлөлүк абалын иликтөөгө алды. Эч шек билдирбей баарын талдады. Башталгыч класста окуган уулу балмуздакты абдан жактыраарынан бери билди. Ал түштөн кийин окуйт болчу. Сабактан чыккан убактысында мектепке жакын жерге келип күтүп турду. Алымбек жакындап келе жатты. Эски таанышындай учурашып, ага балмуздак алып бермек болду. Ою ишке ашып, Алымбек дароо эле макул болду. Жертөлөдө жайгашкан кафеге кирип кетишти. Анткени ал жерде караӊгы киргени билинбейт да. Үч сааттай отурушту. Билишинче жомок айтып берди, балмуздакка тоюшту.
Бул убакытта үйүнө келбей калган уулу тууралуу апасы жолдошуна кабарлап, баары чый-пыйы чыгып издеп жүрүштү. Мектептеги мугалимдерди күнөөлөштү. Жол боюндагы майда соода түйүндөгүлөрдөн сурап чыгышты. Таба алышкан жок.
Жарандык кийимчен абалында балакайды тар жол менен жетелеп жөнөдү. Көп кабаттуу үйдүн кире беришине келгенде чөнтөгүнөн бүктөлгөн кагаз алып чыкты да:
-Сен акылдуу бала болосуӊ. Мына бул катты атаӊдын колуна бергин э? -деп мээримдүү табыштады да эч нерседен капарсыз ыраазы боло белгисиз жигит менен коштошкон окуучу үйүнө көтөрүлдү.
Кыйладан кийин уулун дале таппай сырттан кирген атасы, уулун тирүү көргөнүнө ишенип-ишенбей, шалдайып туруп калды да, уулу аркылуу белгисиз кишиден берилген катты ачты. Бут кийимин чечпей туруп окуп кирди.
Алымбектин ардактуу атасы! Бала баарынан кымбат экен э?
Сиздин муздак мамилеӊизди унутуш үчүн ширин уулуӊуз менен муздак жана ширин балмуздак жеп келдик.
Илгери-илгери, биз окуучу кезде, аялдамадан кыйла өтүп токтоп жүргүнчү түшүрүп, чуркап келип жеткенибизде катуу айдап жылып кетип бизди ылай жолго жыгытып таштап койгон элеӊиз. Эсиӊиздедир, калаа каттамында айдоочулук кылчусуз. Ошондо биз да сиз издеген кымбат балаӊыздай бала элек. Биздин да сиз уулуӊузду жакшы көргөндөй, бизди жакшы көргөн атабыз бар эле. Мындан ары бул окуя кайталанат деп балаӊыздан кабатырланбаӊыз. Бизге өкүнүч болгон ошол окуянын таасирин сизге элестүү кылып эске салып, оӊолушуӊуздан үмүт этип убактыбызды короттук. Сиздерге бейпил турмуш тилейбиз.
Ошол бала.
Кат ушинтип жазылган экен. Айдоочу же ачууланып сөгүнөөрүн билбей же эбаккы кылыктарына кадыресе өкүнөөрүн билбей дубалга сөйөнгөн абалда бут кийимин чечпей кыйлага турду.
Радиодон “жакшылык жасаганга ашыккан адам өкүнө турган окуяга туш болбойт” деп сүйлөп жатканын чала укту. Уулун өз көзү менен көрүп турганга ишене албагандай башкача абалда эле. Ичинен “Эртеӊден баштап жалаӊ мектеп окуучуларын өзүм кыйкырып чакырып алып мектебине жеткирем” деп ойлонду.
Куштарбек Кимсанов, акын, жазуучу, котормочу