Дүйнөнүн эң бийик жери — Эвересттин кыл чокусун багындыруу үчүн 11-май күнү чабуулдук акыркы аракети менен жол тарткан Илим Карыпбеков кайтып келгенин билдирди.
“Жакындарым, туугандарым, мен тирүү! Аман-эсен, сак-саламатмын! Жаңы эле негизги жатакка келдим. Тилекке каршы (Эвересттин кыл чокусуна) чыга албадым. 8400 метрге чейин чыга алдык. Балкони деген жерге чейин чыктык. Шамал 100 метрге чейин болду. Эң негизгиси мен кайтам деген жокмун. Мени биргелешип (шериктер) кайтарып салышты. Калгандарын шашпай айтым берем. Мага сары-санаа болуп, мени сурап аткан бардык жакындарыма рахмат! Баарыңарга салам!”,-деди Карыпбеков.
Кыргызстанда акыркы 4 жылда альпинизм тармагы өрүш алып, өнүгө баштады. Алар “Кыргыз изи” долбоорунун алкагында, жети континенттеги эң бийик жети чокуну багындырып келишти. Анын алкагында дүйнөнүн эң бийик кыл чокусуна Эдуард Кубатов, Кадыр Сайдилкан сыяктуу альпинисттер чыгып түштү.
Быйыл кыргызстандык 10 чакты альпинист аталган долбоорунун алкагында, Непалдагы Эверест, Макалу, Кхумбу сыяктуу бир канча кыл чокуларга чыгуу үчүн эки багыт боюнча аракет кылышты. Анын ичинде Илим Карыпбеков Эверестке чыгуу аракети оңунан чыкпай калса, К.Сайдилкандын да 8485 метр бийиктиктеги Макалу тоосуна чыгуу аракетине ийгилик жылмайган жок. Кыргыз альпинисттерин белгилүү альпинист Эдуард Кубатов жетектеп келет.
Кыргызстандын Альпинизм жана альпинизм федерациясынын президенти Э.Кубатов быйыл Непалдагы 8163 метр бийиктиктеги Манаслу чокусуна кычкылтексиз чыккан тарыхтагы эң жашы улуу адам катары Гиннестин рекорддор китебине кирди. Бул чокуну ал 2022-жылдын 1-октябрында (50 жаш 273 күн курагында) багындырган.