Бүгүн, 15-май күнү Ош облусунун ички иштер башкармалыгында Кыргыз Республикасынын Ички иштер органдарында кызмат өтөп, кызмат учурунда курман болгон кызматкерлерди эскерүү иш-чарасы болуп өттү. Бул тууралуу Ош ОИИБдин басма сөз кызматы билдирди.
Маалыматка караганда, иш-чарага отставкадагы милициянын генерал-майору Расулберди Раимбердиев, ардагерлер кеңешинин төрагасы Курсан Камчиев жана кызмат учурунда каза болгон кызматкерлердин жакындары катышты.
Алгач, кызмат учурунда курман болгондордун айкелине гүл чамбарлар коюлуп, аларга багышталып куран аяты окулду. Андан ары иш-чарага чакырылган коноктордун жана башкармалыктын өздүк курамынын бир минуталык эскерүү учуру орун алды.
«Башкармалыктын башчысы Нурланбек Бурканов кызмат учурунда каза болгон кесиптештерди эскерип: “Урматтуу коноктор, урматтуу кесиптештер! Кылымга тете мезгил аралыгында кыргыз милициясы далай катаал, ары татаал жолду басып өтүп, кылмыштуулук менен айыгышкан күрөш жүргүзүп келет. Өлкөбүздө жарандарыбыздын коопсуз жашоосун камсыз кылуу жана жарандардын укугун коргоо милдети жүктөлгөн кыргыз милициясы, биз бүгүн эскерип турган кесиптештерибиз менен терең сыймыктанат. Анткени, бизге берилген өмүрдө канча жашаганыбыз маанилүү эмес, кандай жашаганыбыз маанилүү дегендей, элибиздин бейпил жашоосу үчүн өз өмүрүн садага чаап, оо дүйнө узап кете берген кесиптештерибиздин эрдиги эч качан унутулбайт. Албетте, баатырлардын өмүр жолу келечек муунга үлгү болуп, Кыргыз милициясынын тарыхында жана мекендештерибиздин жүрѳгүндѳ түбѳлүк сакталып кала берет. Быйыл, 2024-жылы Кыргыз милициясынын түзүлгөндүгүнө 100 жыл толот. Мындан ары катарыбыз кемибесин. Ар бир үйдө бактылуулук өмүр сүрүп, элибиз кайгы-кападан алыс болуп, тирүүлүктүн ырахатына балкып жашоосун тилек кылалы”- деди.
Андан ары башкармалыктын башчысы эскерип жаткан кесиптештерибиздин жакын туугандарына таазим кылуу менен, аларга арналган белектерди тапшырды. Өз кезегинде баатырлардын жакындары жана достору да эскерүү сѳзүн сүйлөшүп, алардын элеси унутулбай, эмгегин баалаган ички иштер органдарынын кызматкерлерине ыраазычылык билдиришти.
Эскерүү иш-чарасы өздүк курамдын салтанаттуу саптык жүрүшү жана эстеликке сүрөткө түшүү менен жыйынтыкталды.
Кыргыз Республикасы эгемендүү өлкө болгондон бери Ош облустук ички иштер башкармалыгынын 41 кызматкери кызмат учурунда каза болгон. 2016-жылдан бери 15-май күнү Ички иштер органдарынын катарында кызмат өтөп жатып кызматтык милдеттерин аткаруу учурунда курман болгондорду эскерүү күнү катары белгиленип келет.