Президенттин Ош облусундагы ыйгарым укуктуу өкүлү Элчибек Жантаев Улуттук коопсуздук боюнча мамлекеттик комитетинин Чек ара кызматынын түзүлгөндүгүнүн 25 жылдыгана карата куттуктоо сөзү.
«Урматтуу Чек ара кызматынын кызматкерлери жана жоокерлери!
Ардактуу ардагерлер!Кыргыз Республикасынын Президентинин Ош облусундагы ыйгарым укуктуу өкүлүн аппаратынын жана жеке өзүмдүн атымдан сиздерди 28-май Кыргыз Республикасынын Улуттук коопсуздук мамлекеттик комитетинин Чек ара кызматынын түзүлгөндүгүнүн 25 жылдык маарекеси менен куттуктаймын!
Кыргыз Республикасынын чек ара коопсуздугун камсыздоо жана коргоо ар бир атуулдун ыйык милдети. Ошондуктан, мекен чек арасынын бекемдиги өлкөбүздүн эгемендүүлүгүнүн, бүтүндүгүнүн негизги шарты болуп келген жана болуп кала бермекчи.
Бул жооптуу кызматты аткаруу милдети мекенге берилген, эрктүү, туруктуу жана мекенчил жоокерлерге гана тапшырылат. Чек ара сакчылары өлкө эгемендигине кол салган негизги соккуну өздөрүнө алып, тайманбастык менен анын мизин кайтарып келишет.
Мамлекет чегинде өз мекенин коргоп туруу татаал, жоопкерчиликтүү иш, ошол эле учурда ардактуу милдет. Чек арачыларыбыздын каармандыгы жана мекенчилдиги өлкөбүздүн коопсуздугунун кепилдиги болуп эсептелет.Карегимде мекен чеги деп эл-жери үчүн өмүрүн арнаган чек арачыларыбыз элибиздин эсинде түбөлүк сакталат. Тилекке каршы Баткен жергесинде болуп өткөн куралдуу кагылышуудан көптөгөн азаматтарыбыздан айрылдык.
Биз Ата-Журт үчүн курман баатырларыбызды эч качан унутпайбыз. Алардын эрдиктери тарых барактарында алтын тамгалар менен жазылып, муунда-муунга үлгү болуп кала берет.
Ал эми, чек ара кызматынын ардагерлери сиздер жоокердик кызматыңыздар менен Ата- Мекенге ак кызмат өтөөнүн салттарын калыптандырууга эбегейсиз салым кошконуңуздар үчүн ыраазычылык билдирип кетемин.Урматтуу жоокерлер жана офицерлер!
Сиздерге бекем ден-соолук жана элибиздин жаркын келечеги үчүн кызмат кылууда ийгиликтерди каалаймын.
Терең урматтоо менен, Кыргыз Республикасынын Президентинин Ош облусундагы ыйгарым укуктуу өкүлү Эльчибек Джантаев»