9-сентябрда Чоң-Алай районунун алыскы Жекенди айыл аймагындагы “Кара-Мык” чек ара заставасында жаңы курулган “Байчечекей” балдар бакчасынын ачылыш аземи болуп өттү. Мындай маалыматты Президенттин Ош облусундагы өкүлчүлүгүнүн басма сөз кызматы билдирди.
Маалыматка караганда, ачылыш аземге Министрлер кабинетинин төрагасынын орун басары — УКМК Төрагасы Камчыбек Ташиев, Президенттин Ош облусундагы ыйгарым укуктуу өкүлү Эльчибек Джантаев чек ара заставанын кызматкерлери жана жергиликтүү тургундар катышты.
«Камчыбек Ташиев мамлекет чек арачыларга мамлекеттин чек арасын коргоосу үчүн зарыл болгон шарттарды түзүү менен бирге, жаш муунга татыктуу келечекти камсыздоо үчүн бардык аракеттерди көрүп жатканын белгилеп, тарыхта биринчи жолу чек ара заставасынын аймагында мектепке чейинки билим берүү мекемеси курулуп, иштей баштаганын айтты»,- деп айтылат маалыматта.
«Байчечекей» балдар бакчасы кыска мөөнөттө курулуп бүткөн. 2023-жылдын сентябрында капсуласы салынган жана 2024-жылдын сентябрында алгачкы балдарды кабыл ала баштады.
Бакча эки кабаттуу болуп 50 орунга ылайыкташкан. Ичинде балдар үчүн керектүү заманбап шарттар түзүлүп, сыртта балдар ойноочу аянтчасы кошо курулган.
Бала бакчада ар кандай курактагы балдар үчүн үч тайпа каралган. Бакчага аскер кызматкерлеринин жана жакын жайгашкан аймактардын тургундарынын балдары барышат.