Кечээ, 10-сентябрь күнү Бишкек шаарындагы Дөлөн Өмүрзаков атындагы башкы стадиондо Кыргызстандын футбол боюнча курамасы менен Өзбекстандын футбол курамасы кез келди. Беттеш коноктордун пайдасына жыйынтыкталды.
Оюнга президент Садыр Жапаров жана УКМКнын төрагасы — Кыргыз футбол биримдигинин президенти Камчыбек Ташиевдер да күбө болду.
Күйөрмандар эмоцияга толгон, чыныгы борбор азиялык дербиге күбө болушту. Оюндун биринчи бөлүгүндө талаа ээлери маал-маалы менен чабуулдарга чыгып, андай учурдун бири гол менен аяктады. Оң капталдан узатылган топту алгач өзбек курамасынын коргоочусу кайтарган болсо, ал топту Алимордон Шүкүров алып, чабуулчу Кожо Жоелге узатты. Жоел бул беттештеги алгачкы голду киргизүү менен «Ак шумкардын» Дүйнөлүк чемпионаттын тандоо этабынын үчүнчү баскычындагы алгачкы голун киргизди.
Кожо Жоел, Алимордон Шүкүров жана Темирлан Козубаев.
Эскерте кетсек, Кыргыз курамасы өз футбол тарыхында үчүнчү баскычта алгачкы ирет ойноп жатканын эске алганда, «Ак шумкарлардын» ганалык чабуулчусу бул тарыхый голду жаратты.
Көп узабай эле Өзбекстандын жарым коргоочусу Атабек Шүкүровдун узатуусунан кийин «Романын» чабуулчусу Элдор Шамуродов эсепти теңеди. Деген менен бурчтан чыгарылган топ Элдияр Зарипбековдун башына тийип, жарым коргоочу Одилжон Абдурахмановдун бутуна тийип коноктордун дарбазасынан орун алып, эсеп эки эселенди. Ага жооп кылып бурч тобунан чыккан топту Хуснидин Аликулов башы менен дарбазага жолдоп, эсепти теңеди. Бул натыйжадан кийин эки тарап тең бири-биринин дарбазасына жол таба алышкан жок.
Оюндун экинчи бөлүгүн коноктор активдүү баштады. Аны менен катар эле чабуул артынан чабуулдарга чыгып жатышты. «Ак шумкар» толугу менен коргонууда ойноп, өз учурунда каршы чабуулга чыгып жатты. Бирок, алардын бири да гол менен аяктаган жок.
Көп убакыт бою дээрлик оюнда кескин өзгөрүү жасай албаган өзбек оюнчусу Остон Орунов оюндун 72-мүнөтүндө Элдор Шомуродовдун пасынан кийин, өзүнүн жеке чеберчилигин көрсөтүү менен бир нече оюнчуну алдап, үчүнчү голду киргизди.
Остон Орунов жана Эрмек Кенжебаев.
Ирандын «Персеполис» клубунун оюнчусунун бул голу оюндагы акыркы голдордун бири болуп, өзбек курамасына жеңишти алып келди.
Эки оюнда эки жеңишке жетишкен өзбек курамасы бул тайпада азырынча биринчи орунду ээлеп турат. Иран Бириккен Араб Эмираттарын 1:0 эсебинде утуп, экинчи орунга жайгашкан болсо, БАЭ үчүнчү орунга, Түндүк Корея төртүнчү, Катар бешинчи, Кыргызстан курамасы алтынчы орунга жайгашты.
Кыргызстандын футбол боюнча курамасы кечээги беттешке чейин Өзбекстан менен 8 ирет ойногон. Ал оюндардын биринде да «Ак шумкарлар» «Ак бөрүлөргө» 1 голдон ашык гол киргизе алган эмес. Өзбекстандан эң ири эсепте жеңилген беттеш 2007-жылдын 9-мартында орун алган. Анда кыргыз курамасы өзбек курамасы менен жолдоштук беттеш өткөрүп, 6:0 эсебинде утулуп калган. 10-сентябрда болгон оюнда кыргыз курамасы Өзбекстандын дарбазасына 2 гол киргизип, бул курама менен болгон жеке статистикасын жаңылады.
«Soccer 365 ru» басылмасынын статистикасы боюнча жыйынтык.
Автор: Бексултан Нуркамил уулу