Төрт мезгилдин кандай учуру болбосун, аба ырайынын ысык-суугуна карабай элге жарык тартуулаган энергетиктердин эмгеги зор. Ар бир үйдө жарык жана жылуулук үчүн чоң жоопкерчиликти сезип эмгек жасаган энергетиктердин учурда кычыраган кыш мезгилине карата даярдыгы кызуу жүрүп жаткан убагы. Буга байланыштуу биз Алай райондук электр тармактар ишканасына кезектеги иш сапарыбыз менен барганбыз. Аталган ишкананын жетекчиси Жээнбеков Акмырза Токтомушович менен тоолук элдин жайлуулугуна кам көрүүдө кандай жумуштар жүрүп жаткандыгы жөнүндө маектешип кайтканбыз.
-Акмырза Токтомушович, алгач Сиз жетектеген райондук электр тармактар ишканасы жөнүндө айтсаңыз?
-Жакшы болот.Чындыгында биздин район тоолуу экенин жалпы журт билет. Бизде кыш эрте түшүп, жаздын келиши да кечеңдеп турат. Андыктан биздин өрөөндүн кышы оор, жайы салкын болуп, шарты катаал, жаратылышы кооз жер. Мына ушул уюткулуу жергебиздин жашоочуларын электр жарыгы менен үзгүлтүксүз камсыздоодо биздин кызматкерлер күн-түн күзөттө турушат. Жаратылыш кырсыктары да арбын болуп келет. Ал учурда да ыкчам жана тез электр энергиясын калыбына келтирүүдө бригадабыз шай турушат. Бизде төрт участкабыз бар, алар Гүлчө-1, Гүлчө-2, Сопу-Коргон жана Сары-Таш участкалары. Жалпы 480 трансформатор, 500 километр линияны тейлейбиз.
Бул жагы Эркеш-Там, Чоң-Алайга чейин созулат. Райондо калктын саны аз болгону менен эң узун фидрлер бизде жайгашкан, аралык аябай узак.
-Кылычын алып кыш келүүдө, сиздерде кышка даярдык кандай жүрүүдө?
-Ырасында биздин тармакта эки гана мезгил болот. Ал кышка даярдык жана кыштан чыгуу. Азыр бизде кышка карата даярдык кызуу жүрүүдө. Учурда 7 айга коюлган иш-пландын барын 100 пайызга аткардык. Анын кээ бирине токтолсом, энергобьектилерди 2024-2025-жылдардын күз-кыш мезгилдерине даярдоо максатында, Каратай-Гүлчө 110кВ, Гүлчө-Сары-Таш 110кВ аба чубалгыларында пландаштырылган оңдоп-түзөө иштери толук алынып барылды.
Ошондой эле, Сопу-Коргон участкасында энергобьектилерди күз-кыш мезгилдерине даярдоо алкагында оңдоп-түзөө иштерин да аягына чыгардык.
Ал эми Таргалак айылындагы ТК-167 «Таргалак-Чаты» капиталдык ремонттон өткөрүлүп, айланасына атайын тосмо орнотулду. Ошондой эле, «Каратай-Гүлчө», «Гүлчө-Сопу-Коргон», «Сопу-Коргон- Сары -Таш» 110 кВ аба чубалгыларында көп сандагы обочолонгучтарды алмаштырып, «Сары-Таш — Сары-Могол» 35 кВ чыңалуудагы аба чубалгысы да алмаштырылды. 04 төмөнкү 209 километр линияларга техникалык ремонтторду жүргүздүк. Анын ичинде бак-дарактарды кыйуу, бузулган тетиктерди алмаштыруу сыяктуу иштер ийгиликтүү алынып барылды. Жалпылап айтсам, жети айдын аралыгында 32 даана көмөкчү чордордорду капиталдык ремонттон өткөрүп, 202 трансформаторду техникалык кароодон өткөрдүк.
-Акмырза Токтомушович, сиздердин ишкананын техникалары жөнүндө айтсаңыз, алардын абалы кандай?
-Жакшы суроо болду. Бизге жакында жаңы «кран манипулятор» техникасы берилди. Ошону менен бир жылда үч техника берилди. Ачыгын айтканда мен энергетика тармагында 20 жылдан ашуун иштесем, бир жылда үч техника берилген учур биринчи жолу катталууда. Албетте, бул өтө чоң жетишкендик. Мурда эски техникалар берилген учурлар болгон, аларды оңдоп-түзөп жатып эле чарчачуубуз. Азыр заводдун өзүнөн түз алынып келинүүдө. Шүгүр, азыр техникаларга болгон муктаждыктарыбыз чечилип келүүдө. Тоолуу аймак болгондуктан, жаратылыш кырсыктары катталбай койбойт. Кыш оор болгондуктан алыскы өрөөндөргө барууга техникаларга муктаждык болуп келген. Азыр жаңы бригадалык машинаны Сары-Таш участкасына бергенбиз. Калган техникалабызды да кароодон өткөрүп, эл кызматына иштетип келебиз.
-Имаратыңыздар оңдолуп, иштөөгө жакшы шарттар жаралып калганын байкадым. Эшик алдында оролгон чубалгылар жаңы келгендей?
-Туура айтасыз. Биринчи иштөөгө шарт түзүп берип, анан ишти талап кылыш керек. Ошондуктан имаратыбыз ремонттон өтүп, техникалык базабыз чыңдалды. Андан да элге өзүбүз үлгү бололу деп, электр энергиясын үнөмдөө үчүн атайын көмүр менен жылытуучу откана куруп, жылуулук системабызды алмаштырдык.
Мекемебизге 80 адамга ылайыкташтырылган актылык жыйындар залын түзүп, пайдаланууга бердик. Буга чейин, Алай РЭТинде актылар залы жок болгондуктан, жыйындар, ар түрдүү иш-чаралар мекеменин эшик алдында өткөрүлүп келген.
Ал эми чубалгылар жөнүндө айтсам, бул чубалгылар SIP кабели деп коебуз, ал кабель изоляциясы менен болот. Бул кабелден беш километрге келген. Учурда бул кабель 04 төмөнкү линияларга тартылууда. SIP кабелдин пайдасы, авариялык өчүрүү болбойт, электр энергиясын жоготуу болбойт, коопсуздук жагы жогору. Мунун өтө пайдасы чоң болгондуктан, кийинки жылга бизнес-планды түзүп жатабыз, дагы көбүрөөк линияга тартууга алдыралы деген планыбыз бар.
-Эр жүрөк энергетиктер жөнүндө кеп кылсаңыз, сиздерде кадр маселеси кандай, кызматкерлердин коопсуздугу сакталууда кандай шарттар каралган?
-Бизде жалпы 82 кызматкер иштейт. Кадр маселеси жетиштүү. Бардыгы электр тармагы боюнча билими бар адистер. Электромонтерлор, мастерлер, инженерлер деги эле тиешелүү адистерибиз тынбай окуу курстарга барышып, даярдыктан өтүп турушат. Иштөөгө бардык коопсуздуктар каралган. Шарты оор Сары-Таш участкабызда 14 адис иштейт. Аларга заманбап шарттары менен контора куруу, кийинки жылга пландалып, бизди кубантып турат. Андан да бардык эскилиги жеткен көмөкчү чордондор да жаңыланат деп турабыз. Биздин көрсөткүчтөр жакшы. Дебитордук карыз дээрлик жокко эсе. Электрондук эсептегичтердин мөөнөтү бүткөндөр, акылдуу эсептегичке өтүшүүдө. Элибиз жакшы, электр тармагын түшүнүү менен кабыл алышып, энергияга болгон төлөмдөрдү өз убагында төлөп турушат.
Учурдан пайдаланып элге кайрылып кетсем, электр жарыгы оңойчулук менен келбейт. Аны калкка жеткирүүдө канчалаган түйшүк, мээнет кетип жатат. Ошол эмгекти баалап, өлкөбүздүн жарык жашашы үчүн энергияга болгон үнөмдүүлүктү туура пайдалансаңыздар демекчимин. Анан да биздин иштен кабар алып келген сиздерге чоң рахматымды айтам. Биздин эмгекти элге туура-так чагылдырууга болгон аракетиңиздер бизге стимул тартуулады. Редакция жамаатына ийгиликтерди каалайбыз.
Маектешкен: Назгүл ӨМҮРЗАКОВА.