Министрлер кабинетинин төрагасынын орун басары — УКМКнын төрагасы Камчыбек Ташиев «Ата- Журт» партиясы 17-ноябрда өтө турган жергиликтүү кеңештердин шайлоосуна жана Жогорку Кеңештин шайлоосуна катышпастыгын билдирди. Бул тууралуу ал Фейсбуктагы баракчасына жарыялады.
«Баарыңыздарга белгилүү болгондой президенттин жарлыгы менен 17-ноябрь күнү өлкө боюнча жергиликтүү кеңештерге шайлоо болгону турат. Мага жеткен маалыматтар боюнча жер-жерлерде депутат болом деген талапкерлер “Ата-Журт” партиясы менен катышабыз деген пикирлерин билдирип жатышыптыр. Айрым жердерде лидерликти жана тизмеде биринчиликти талашкандар болуп жатат экен. Арасында көпчүлүгү баягы эле илгертен бери бийликте тургандардын партиясы менен депутат болуп келип жүргөн жүздөр», — деген Ташиев.
Ал ошондой эле эмне үчүн аталган партиянын шайлоого катышпастыгын түшүндүргөн.
“Ата-Журт” партиясын түптөгөндөрдүн сап башында турган адам катары айтам: “Ата-Журт” партиясы 17-ноябрдагы жергиликтүү кеңештердин депутаттарын шайлоого катышпайт. Эмне үчүн мындай чечимге келдим? “Ата-Журт” партиясы аталганда эле менин ысымым менен байланыштырышат. Ошондуктан, мен мамлекеттик кызматта олтуруп алып партияны бул шайлоого катыштырсам туура эмес болуп калат. Керек болсо 2026-жылкы парламенттик шайлоого дагы катыштырбаймын. Албетте сиздер тараптан: “Анда эмне үчүн 2021-жылы парламенттик шайлоого катыштырдыңыз?”,- деген суроо болот. Чынымды айтсам ал убакта чырм эткенге убакыт жок иш менен алек болуп жүрүп, шайлоого деле көңүл бурган эмес экенмин. Партиянын мүчөлөрү келип: “Камчыбек Кыдыршаевич, уруксат берсеңиз “Ата-Журт” партиясы менен парламенттик шайлоого катышалы”,- деп сурангандарынан — “Мейлиңер”,- деп уруксат берип койгон элем. Эми мындан ары “Ата-Журт” партиясы шайлоолорго катышпайт», — деп жазган атайын кызматтын башчысы.
Кыргызстанда жергиликтүү кеңештердин шайлоосу 17-ноябрга дайындалды. Бул тууралуу жарлыкка президент С. Жапаров кол койгон.