15-сентябрда Жалал-Абад шаарындагы «Курманбек» стадионунда Кыргыз Республикасынын 1XBET Кубогунун финалдык беттеши болуп өттү. Кубок үчүн чечүүчү беттеште «Абдыш-Ата» (Кант ш.) жана «Мурас Юнайтед» (Жалал-Абад ш.) клубдары ойношту, деп билдирди Кыргыз футбол биримдиги.
Маалыматка караганданда, беттештин биринчи бөлүгү 0:1 эсебинде конок команданын пайдасына аяктады (Ягр, 25′). Командалар экинчи бөлүктү катуу кармашта өткөрүп, талаа ээлери эсепти эки ирээт теңей алышты. 2-2 эсеби менен аяктаган жолугушуунун экинчи бөлүгү (Батырканов 60′, 74′ — Ягр 25′, Атабаев 66′) жеңүүчүнү аныктаган жок, андыктан командалар кошумча убакытка өтүштү.
«Экинчи кошумча убакыттын башында Боколеев «Мурас Юнайтедди» алдыга чыгарып — 3:2, эсеп финалдык ышкырыкка чейин өзгөрүүсүз калды. Ошентип, «Мурас Юнайтед» Кыргыз Республикасынын Кубогунун эки жолку жеңүүчүсү болду»,- деп айтылат маалыматта.
Бул беттеште калыстарга видео жардам берүү системасы — VAR колдонулду. Оюнду Өзбекстан менен Кыргызстандын өкүлдөрүнөн турган калыстар тобу тейледи.
Кыргызстандын кубогун көп уткан клубдардын сап башында «Дордой» клубу турат. Анын капчыгында 10 кубок бар. Бишкек шаарынын «Алга» командасынын капчыгында 9 кубок бар болсо, «Абдыш-Ата» акыркы эки жылда катары менен финалга чыгып, эки жолу тең «Мурас-Юнайтед» клубуна утулуп калды. Жалпылап алганда «Абдыш-Ата» клубунун капчыгында 5 кубок бар. Ал эми «Алай», «Нефтчи», «Мурас-Юнайтед» клубдарында экиден кубок бар.