16-сентябрда Президенттин Ош облусундагы ыйгарым укуктуу өкүлү Э. Жантаев Ноокат районуна иш сапары менен барып, Ош-Ноокат жолун оңдоо жана Кыркол-Сай, Чили-Сай көпүрөлөрүн куруу иштери менен таанышты. Бул тууралуу аталган өкүлчүлүктүн басма сөз кызматы билдирди.
Маалыматка караганда, текшерүү учурунда облус жетекчиси тиешелүү адистерге иштин ылдамдыгын токтотпой, убакытты туура пайдаланып, курулуш иштерин сапаттуу жана өз убагында бүтүрүп алуу зарылдыгын белгиледи.
«Буга чейин айланып өтүүчү жолдорду аныктап чыккансыңар, эми алдыдагы асфальт басуу иштерине байланыштуу элге түшүндүрүү иштерин жүргүзүп, калктуу пунктар аркылуу айланып өтүүчү жолдорду ачып бергиле. Асфальт басуу иштерине көмөктөшөлү, ишти үзгүлтүккө учуратпайлы. Азыркы жылуу мезгилди туура пайдаланып алышыбыз керек. Убакыт аз калды. Ошон үчүн ишти токтотпой, жумушту чогуу жасайлы. Мына мен бүгүн атайын тийешелүү жетекчилердин баарын алып келдим, маселе болсо көмөктөшүп ишти алып барышат,”-деди Элчибек Жантаев.
Андан ары ыйгарым укуктуу өкүл Гүлистан айыл аймагындагы Чили-Сай көпүрөсүнө сапар алды. Жол бойлой жолду кеңейтүү жана кызыл сызыкка чыгып кеткен мыйзамсыз курулуштарды алып салуу иштерин көз салды.
«Ал эми Чили-Сай көпүрөсүнүн ушу тапта курулуш иштери кызуу жүрүп жатат. Облус башчысы иш ыргагы менен таанышып чыгып, мында дагы тииешелүү адистерге иштин ылдамдыгын токтотпой, көпүрөнү сапаттуу жана өз убагында бүтүрүүнү эскертти», — деп айтылат маалыматта.
Иш сапардын аягында Ноокат районунда селден жабыркаган жарандардын жаңыдан курулуп жаткан турак жайларынын курулушу жана аларга өкмөт тараптан бөлүнгөн каражаттын максаттуу пайдаланышын тыкыр көзөмөлдөп туруу боюнча район жетекчисине жана айыл аймак башчыларына конкреттүү тапшырмаларды берди.