Бүгүн, 24-сентябрда Жогорку Кеңештин Конституциялык мыйзамдуулук, мамлекеттик түзүлүш жана сот-укук маселелери боюнча комитети Аскар Акаевдин экс-президент макамын кайтаруу боюнча кайрылуусун карады.
Комитеттин төрайымы Чолпон Султанбекова («Ишеним») бул кайрылуу Жогорку Кеңешке 3-сентябрда түшкөнүн айтты.
Депутат Гуля Кожокулова («Бүтүн Кыргызстан») маселени ар тараптуу карап чыгуу үчүн убактылуу депутаттык комиссия түзүү зарылдыгын белгиледи.
Жанар Акаев («Альянс») Аскар Акаев президент болуп турган убакта өлкөдө үй-бүлөлүк башкаруу орноп, Аксы окуясы болгонун билдирди.
Комитет талкуунун жыйынтыгында Жогорку Кеңешке бул кайрылууну колдоодон баш тартууга чакырды.
Аскар Акаев 2005-жылдын 24-мартындагы төңкөрүштө «Кант» авиабазасы аркылуу өлкөдөн качып кеткен. Азыркы кезде Ломоносов атындагы Москва мамлекеттик университетинин профессору, Россия илимдер академиясынын чет өлкөлүк мүчөсү. Ал 16 жылдан кийин, 2021-жылдын августунда Кыргызстанга келген.
Аскар Акаевге козголгон кылмыш иштин токтотулганын Башкы прокуратура 2023-жылдын 13-январында билдирген.
«Кылмыш иштин алкагында Аскар Акаевге кызмат абалынан кыянаттык менен пайдаланууга аралашуу, 1992-жылы «Камеко» компаниясы менен башкы макулдашуу түзүүдөгү шалаакылык эпизоду боюнча жана «Кумтор» долбоорун 2003-жылдагы реструктуризациялоо боюнча айып тагылган»,- деп айтылган маалыматта.
Башкы көзөмөл органынын маалыматына ылайык, кылмыш иш мөөнөтү өткөндүгүнө байланыштуу кыскартылган.