[cmsmasters_row][cmsmasters_column data_width=»1/1″][cmsmasters_text]
Сүрөт: «Империянын кулашы». Автор: Томас Коул. 1837-жыл
Адамзат жамаат-жамаат болуп жашагандан тартып эле жашоо үчүн күрөш башталып, адам баласы жаңы жерлерди өздөштүрө баштады. Тээ ошол доордон бүгүнкү күнгө чейин адамдар Жер бетинде ким лидер экенин жана ким кожоюн экенин талашып-тартышып келүүдө. Эмесе биздин замандын ушул 2023 жылынын ичинде кайсыл империялар планетабызды башкарып турганы боюнча тарых барактарына үңүлүп көрөлү.
«Келдим, көрдүм, жеңдим»,- Гай Юлий Цезарь
«Биздин заман» деп эсептелгенден бери 21 кылым өкүм сүрүүдө. Ошондо адамзат биздин замандын 20 кылым 23 жылын баштан кечирди. Бул аралыкта эмне деген зор империялар пайда болуп, нечендери жок болду дейсиз. Учурунда зор империя болуп, жер шаарын башкарып тургандардын айрымдарынын мураскерлери дале болсо бар.
21 кылым ичинде планетабызды он үч империя бийлеген. Бул макалада өз замынын дөө-шаасы болуп турган империялар боюнча учкай токтолобуз.
«Арстандар башкарган койлордун армиясы, ар дайым койлор башкарган арстандардын армиясын жеңет»,- Наполеон Бонапарт
Биздин замандын I-IV кылымы, Жер бетинде эң көп өкүм сүргөн империя- Рим
Рим империясы эң узак өкүм сүргөн империялардын бири десек жаңылышпайбыз. Империя жалпы жонунан 12 кылым өмүр сүргөн. Империянын негизделишин 12 карга тууралуу мифке салыштырышат. Мына ошол себептүү 12 кылым өмүр сүргөн деп айтылып жүрөт.
Рим империясы Байыркы Рим империясынын мураскери болуп, биздин замандын I-IV кылымдарында жер шаарынын эң ири империясы катары бийлеп турду.
Vкылым. Хуннулар, хундар же гунндар: Аттиланын башкаруусундагы Гунн империясы
Тарыхта Аттила римдиктер тарабынан варвар катары сыпатталып, Батыш европалыктар «Кудайдын балээси» деп аташкан. Анткени, ал христиандарга каршы ырайымсыз согуш жүргүзгөнү айтылат. Гунндардын улуу падышасы аталган Аттила болжол менен 395-453-жылдары жашап өткөнү жазылган. Анын гунндардын башкаруучусу катары 434-453 жылдар көрсөтүлгөн. Аттила гунндардын башкаруучусу болуп турган учурда Чыгыш Рим империясынын борбору Константинополь (азыркы Стамбул шаары), Батыш Рим империясынын борбору Равенна шаары (азыркы Италиянын аймагындагы Равенна шаары)болгон. Аттиланын күчү эки дөө-шаа империяга тең жетип турган. Ал башкарган жылдары гунндардын аймагы Кара деңизден Борбордук Европага чейин, Дунайдан Балтикага чейинки аймакты камтыган. Ошондой эле, Аттила зор кубаты бар аскери менен Балканды басып алып, борбору Константинополь шаарында жайгашкан Чыгыш Рим империясынын императорун салык төлөөгө мажбурлап, салык чогулта баштаган. Анан калса 451-жылы Батыш Римге чабуул уюштуруп, жеңүүлүгө учураган. Бул согуш тарыхта «Каталаен талаасындагы согуш» (Каталаен талаасы азыркы Франциянын Труа шаарынын аймагы) катары жазылып калган. Мындай кубаттуу империя Аттила каза болгондон кийин күчүн жоготкон.
VI кылым. Византия же Чыгыш Рим империясы
Тарыхта Византия деп эскерилген империя же Чыгыш Рим империясы 527-565- жылдары ошол кездеги Юстиниан Iдин башкаруусунда аймактарын кеңейткен. Алсак, Чыгыш Рим империясы жогорудагы падышанын убагында Жер-Ортолук деңизин, Африканы, Италияны, Римди ээлеп турган. Бул империя VI кылымдагы жер бетинин дөө-шаа лидерлеринин бири болгон.
Уландысы кийинки чыгарылышта.
[/cmsmasters_text][/cmsmasters_column][/cmsmasters_row]