Мындан 85 жыл мурун октябрь айында “Ош жаңырыгы” (“Кыргызстан большевиги”, “Ленин жолу”) газетанынбиринчи саны чыгып, облустук-коомдук, саясий, маданийтурмушунда чоң окуя болгон.
Гезитте иштеген өткөн күндөргө кайрылсаң эмнелерди гана эске салбайт.
Редакцияда эмгектенгендер гезиттин түмөн түйшүгүн, ийгиликтерин эриш-аркак чогуу тарткан, жамаат канча ирет жаңыланып, канча ирет өзгөрдү.
Улуу устаттардын жолун кийинки муундагылар улантып, улам жашарып, тыным
албай улам жаңы саны үзгүлтүксүз чыгып келет.
Өмүр таржымалы
Моңолбаев Талантбек Шарипович Кара-Кулжа районунун Капчыгай айылында төрөлгөн. Москвадагы Ломоносов атындагы мамлекеттик университетинин журналистика факультетин аяктаган соң, Кыргыз Телетайптык агенттиги — ТАССтын кабарчысы болуп эмгек жолун баштаган. 1986-1991-жылдары “Ленин жолу” гезитинин атайын кабарчысы, котормочусу, бөлүм башчысы болуп эмгектенген. Ош облустук мамлекеттик администрациясынын жетекчиси, “Ош жаңырыгы” гезитинин башкы редактору, “Туризм жана спорт” боюнча Ош облустук комитетинин төрагасы, Ош облусунун мамлекеттик администрациясынын башчысы-губернатордун басма сөз катчысы, 1998-2009-жылдары Ош шаардык “Вечерний Ош” гезитинде башкы редактор болгон. 2010-2013-жылдары “Ош жаңырыгы” гезитинин башкы редакторлук кызматын аркалаган.
Ал Кара-Кулжа районунун Капчыгай айылдык кеңешинин депутаты болуп шайланган, Кыргыз Республикасынын Ардак грамотасы, “Манас 1000” , “Ош 3000”, “За заслугу” медалдары менен шайланган. Кыргыз Республикасынын Журналисттер Союзунун жана Ош облустук кеңештин, Ош шаардык мэриясынын бир нече Ардак грамоталары менен сыйланган. Кыргыз Улуттук Жазуучулар союзунун мүчөсү болгон. Акын жана жазуучу, белгилүү памфлетчи Моңолбаев Талантбек “Дил балкым”, “Калем саптагы шишкебек”, “Эл чыгааны” китептеринин автору.
Алгачкы чыйыр
Жаңы эле жумушка орношкондо жамаат өтө сүрдүү көрундү. Галстугун тагынып, кара костюмун кийген кычыраган журналисттер, коридордон ары-бери басып жүргөн ак чачтуу агайларды көргөндө кантип иштешем деген кооптонуу болгон. Алардын арасында арык, узун бойлуу, келишкен, жаш журналист бар экен. Бул жигит жаңы келди, Москвадан бүтурүптүр деп тааныштырышты. Москвадан окуп келген журналист Талантбек Моңолбаев экен. Удаа келген экөөбүзгө тегиз мамиле жасап, колдоо көрсөтүп макалаларыбызды гезитке жарыялоого жардам беришти. Көп өтпөй Талантбек Моңолбаевти аймактык кабарчылыкка көтөрүштү. Убакыт учкан куштай өтөт тура. Кечээги узун бойлуу, арык чырай жигит иштеги чыгармачылык, жөнөкөйлүгү, аракетчил жөндөмү менен бир топ жогорку кызматтарда иштеп, өзүн таанытты. Өмүрү өрнөк , таржымалы тарыхка бай, ташка тамга баскандай калган нечен мыкты инсандар, эмгектен баар тапкандар бар. Алардын катарында Талантбек Моңолбаев көп жылдар журналисттик кесипте аркалап, эмгеги менен элге таанылып, чыгармачылыгы өсүп, жазганынан жаза элеги көп, чыгармачылыкка толуп ташып турган кырчын курагында капилеттен көз жумган.
Кесиптешибиз жөнүндө эскерүүнү эп көрдүк. Ал кезде гезит бүт бойдон кол эмгеги менен гана даярдалып чыкчу. Бүгүнкү компьютердик-техника үч уктасак да түштө жок нерсе эле. Москвада сьезддер, пленумдар, Жогорку Кеңештин сессиялары же алар өзүбүздө өткөндө түнкү саат бир экиге чейин (кээде үчкө чейин ) иштечүбүз. Алардын материалдарын “Кыргыз ТАГ” кыргызчага которулуп, даярдап берип, газетанын эртеңки саны чыкканча, тикебизден тик турабыз. Анда гезиттин нускасы 80 000 болгон. “Ленин жолунда” гезитинде күндөлүк иш ушундай эле. Жаштардын көзү курч болот, журналист болом десеңер убакыт-саатты эсептебегиле, ушундай түнкү уйкуну кечип, үйрөнгүлө деп айтчу улуу устаттар.
Дээринен кесибин сүйгөн, ардактаган кесипкөй Талантбек Шарипович өзү иштеген гезитте актуалдуу маселелерди көтөрүп, макалаларды жазып, белгилүү журналисттердин катарына кошулду. Өзгөчө улууларды аздектеп, урматтап, башкача сыйлап, чоң мааракелерден калтырбай машинесине отургузуп алып барып, сый көрсөтөөр эле. Чыгармачылыкта болсо талбай иштээр эле. Өлкөнүн экономикалык көйгөйүнө көп өкүнгөнүнө күбө болдук. Ар кандай көйгөйлөрдү чечүүгө аракет кылды. Баса, акын, памфлетчи катары да өзүн тааныта алды. Ал шаардык гезитти жетектеп турганда кыргыз тилин өнүктүрүүгө өзгөчө салым кошту. Гезитти чыныгы идеологиялык куралга көтөрүүгө умтулган редактор болду. Үч тилде чыгып, окурмандардын катарын көбөйттү. Шаардык кеңешке депутат болуп шайланып, сессияларда кыргыз-тилин жана маданият тармагын көтөрүү үчүн көптөгөн маселелерди ишке ашырган. Ошол учур демократия, рынок заманында түшүндүрүү үчүн бул тематиканы адистер аркылуу макалаларды жарыялаганга кызыкчу. Каада-салттар, мурастык рухий дүйнөгө кеңири басым жасачу. Гезиттик материалдардын мазмунуна маани берүү менен калемгердин калемин курчутуп турар эле. Талантбек гезиттик материалдарды талдап, сындап журналисттин шыгына карап кеңеш берген маданияттуу редактор болду. Эч качан жаман сүйлөп, кейип-кепчиген эмес. Жөн эле буйрук берүүчүлүк мүнөздү колдонбогону, катуу айтпаганы үчүн өзгөчө сыйлап, урматтап турушаар эле. “Ош жаңырыгы” гезитинин 75 жылдык юбилейин өткөрүү буйругу насип эткен экен “Ленин жолу” гезитинин даңазасын көтөрүп, калемгерлерди чогултуп, өзү аябай сүйүнүп, карылыкка жетүү кандай бактылуулук, деп ардагерлерди өзгөчө сыйлаган эле. Ал жетекчилерге кайрылып журналисттер аллеясын уюштурду. Жыл сайын ишембилик уюштуруп, бак олтургузуп отургучтарды сырдап, актап журналисттердин башын бириктирип, ар кандай иш-чараларды өткөрүп, демилгелүү инштерди көтөрүп турчу.
Талантбек Шарипович талантка бай калемгер катары да отурган жери күлкү, шаңга бай эле. Чукугандай сөз таап, өтө тамашакөй болчу. Макал-лакаптарды абдан жакшы билчү, аны бурмалап айтып, отурган жерин шаңга бөлөп турчу. Андай куудул тамашалары, тамсилдери китептеринде жазылып калды. Бир ирет биздин кабинетке кирип калды. Газеталар туурасында сүйлөшүп калдык. Кыш ортолоп калган кез эле. Ошол замат Алайкуулук досуна телефон чалып калды. Ал-жайды сурап, досум Алайкууда кар кандай? Жол кандай? – десе, досу «кар аппак, жол ийри-буйру» деди. Ошондо баарыбыз каткырып күлүп калдык. Кар аппак, жер ийри-буйру экенин баары эле билет да, деги жөн жооп бербейт, ушинтип чыгармачыл кишиге шык беришет деп күлүп калды. Мындай тамашаларынын көбүнө күбөө болдук. “Кабагым кашым” дебей (ооруп жүрсө да) ар дайым жаркылдап жайнап жүргөн устат редактордун жүргөн жери тамашага толуп тураар эле.
Достукка бекем, жамаатка камкор инсан
Куттуу жерге кут даарыган инсандар көп келчү редакцияда жолугушуулар көп болоор эле. Талантбектин эң жакын достору келип турчу. Эл акыны Кожогелди Култегин, акындар Кармышак Ташбаев, Турабай Жороев, Тазагүл Закирова, Салима Шарипова жана коомдук ишмер Жапаркул Ташиев, эмгек ардагерлери коомдук ишмерлер Азим Карашев, Орозбек Акимбаев сыяктуу инсандар көп келишчү. Бишкектен келген акын-жазуучулар, журналисттер сөзсүз Талантка жоолугуп, андан соң сапарын улантып жер-жерлерге барышчу. Достукту бекем тутунган, барктап сыйлаган, жолдоштукка бекем, мамиле жана милдетти жогору койгон мырза жигит болчу. Гезиттин барк-баасын көтөрүү үчүн кызыктуу, актуалдуу макалаларды жазып, эл үнүн угуп, көйгөйүн көтөргөн мыкты журналисттерге ар тараптуу камкордук көрүп, шарт түзүүгө аракет жасачу. Ынтымак-ырашкерликте иштеп, бир жакадан баш, бир жеңден кол чыгарып, улууну урматтап, кичүүнү сыйлап, жаш журналисттерге камкордук жасап ишти илгерилетүүгө жан үрөп иштеди. Ал ак пейил, камкор, мырза жигит, пейилинен жазбай мырза жигит боюнча күлгүн курагында өтүп кеткени өкүттө калтырды.
Д. Жусупбекова