КР Билим берүү жана илим министрлиги Дүйнөлүк банктын каржылык колдоосу менен ишке ашырып жаткан «Келечек үчүн билим берүү» долбоорунун алкагында, пилоттук 1200 мектептеги 25 миңдей педагогду окутту. Эми алдыда дагы 33 миңдей мугалим атайын тренингден өтөт.
Бул тууралуу долбоордун Кыргызстандагы өкүлчүлүгүнөн билдиришти.
Маалыматка ылайык, педагогдордун кесиптик көндүмдөрүн жогорулатууга багытталган иш-чаралар 2023-жылдын июнь жана август айларында Кыргызстандын бардык областарында жүрдү.
Атап айтканда:
• «Санариптик сабаттуулук» программасы боюнча –15 500дөн ашык мугалим;
• «Инновациялык педагогикалык технологиялар» программасы боюнча — 3 миң мугалим;
• «Инновациялык педагогикалык технологиялар жана STEM билим берүүнүн негиздери» программасы боюнча — 3 миңден ашык мугалим;
• «Коррекциялык окутуунун техника жана ыкмалары» программасы боюнча — 3 миңден ашык мугалим окутуудан өттү.
Окутуулар гибриддик форматта – онлайн жана реалдуу режимде жүргүзүлдү. Калган педагогдор 2023-жылдын октябрь-ноябрь жана 2024-жылдын март, май, июнь айларында тренингдерге катышат.