Казакстандын Актөбө шаарына түнөккө калган “Жардам кербени” 9-апрелде төрт облуска багытталды. Кечээ Казакстандын сааты менен 22:15те келген кербенди жергиликтүү бийлик өкүлдөрүнөн губернатордун орун басары тосуп алып, кыргыз куткаруучуларына ыраазычылык катын тапшырды, деп билдирди ӨКМдин басма сөз кызматы.
Маалым болгондой, ал ошондой эле бир тууган кыргыз эли жардамга алгачкылардан кол сунганын билдирип, эки элдин бир туугандыгы, ынтымагы далилделери, мындан ары да коңшулаш мамиле бекемдерин билдирди.
Мындан соң КР ӨК министринин орун басары, полковник Урматбек Шамырканов жана Актөбе облусунун губернаторунун орун басары Г.Елеулов жергиликтүү ЖМК өкүлдөрүнө биргеликте билдирүү жасашты.
«Суу каптоодон жабыркаган элге багытталган жардам Казакстандын аймагында Жамбул – Түркестан – Кызылорда – Актөбө облустарында аба ырайынын ар кандай шарттарына карабай, күн-түн жол жүргөн кербен 4 облуска бөлүндү»,- деп айтылат маалыматта.
АКостанай облусуна 3, Актөбө облусуна 4, Орал (Уральск) облусуна 4, Атырау облусуна 4 жардам унаалары багыт алды. Ал эми 8-апрелде Костанай облусуна жөнөтүлгөн жардам кербени түнкү саат 1:30да жеткен.
Учурда Казакстандын Өзгөчө кырдаалдар министрлигинин жана ИИМдин жол коопсуздук өкүлдөрү коштоп жүрүүдө.
Кыргызстан жөнөткөн гумжардамды 6-апрелде Кыргызстандан Өзгөчө кырдаалдар министри, генерал-майор Бообек Ажикеев коңшу өлкөгө узаткан.
Жалпысынан кербен курамында Өзгөчө кырдаалдар министрлигинин 10 куткаруучусу жана 17 айдоочу 15 фура менен 300 тонна жүк келди.
Казакстандагы суу каптоодон улам 16 миңдей эл, 6000 жаш балдар эвакуацияланган. Убактылуу пункттарында 4миңден ашуун жаран, анын 200дөй бала жайгашкан.