Барак эксклавынын тургундары үй-жайы менен кошо Кыргызстанга толук түрдө көчүрүлүп келди. Барактыктарды көчүрүү иштеринин акыркысы 15-апрель күнү болгон. Учурда аларга турак жай куруу маселеси каралууда.
«Турмуш» басылмасы жазгандай, Барак эксклавынын тургуну Жалал Шарипов барактыктардын көкөйүн кескен жол көйгөйү кыйнап, Кыргызстанга өтүү кыйынга турганын айтат. Бүгүнкү күндө уй-жайларынын баары көчүрүлүп, жакшы иш болгонун белгиледи.
«Биз Барактагы жерлерибизди таштап келдик. Чынын айтсам, туулган жерди таштап чыгуу кыйын болду. Өзүбүздү үйлөрдү бузуп чыгыш… Ал дак эми өзүбүздүн туулган жер, кичинебизден ошол жерде чоңойгонбуз. Ачыгын айтканда көзүбүзгө жаш келип, ыйлап жибергендер да болду. Үйлөрдү бузуп жатышканда канча болдук.
Өкмөткө ыракмат, ушунча жардам берип, көчүрүп келип, ӨКМдөн бери жардам берип жатышты.Ал жакта эч кандай буюмдарыбызды калтырбастан баарын бул жакка алып чыгып беришти.
Баракта эң негизги көйгөй – жол маселеси болчу. Жаныбызда пост турса, Баткен облусунун Кызыл-Кыя шаарындагы посттон өтүп, бир күн кечке чейинки убактың жолго эле өтүп кеткен учурлар болгон»,- деди Ж. Шарипов.
Барактын дагы бир тургуну Исамидин Субанов аларга тезинен үй куруп берип, үлүш жерлерди бөлүп берсе жакшы болорун белгилеп, Барактан көчүрүп чыкканы үчүн өлкө жетекчилигине ыраазылыгын билдирди. Анткени, Субанов белгилегендей, акыркы учурда Баракта жашоо кыйынчылыктарды жаратып калган эле.
«Акыркы учурда Баракта жашоо өтөт кыйынчылыктарды жаратып калган. Президенттибизге ыракмат, ушундай жардамдарды берип, жерлерди алмашып, бизди көчүрүп келгенине. Эми бул жакка тезинен үй салып беришип, үлүш жерлерди бөлүп беришсе жакшы болот»,- деди ал.
Азыркы күндө барактыктар туугандарынын үйүндө, ижарага алынган үйлөрдө, Ала-Тоо айыл аймагындагы бир нече айылдардаа жашап, күн кечиришүүдө. Тургундардын айтымында, аларга салына турган үй ушул жылдын август айында бүткөрүлөрү тууралуу жергиликтүү бийлик маалымат берген. Жарандар турак жайлардын тезирээк бүтүп, үлүш жерлери бөлүнүшүн гана күтүп турушат.
«Азыр ар кимибиз ар жакта жашап жатабыз. Тельман айылында жашап жатышат, Кашкар-Кыштакта, Сары-Колотто жана башка жактарга көчүп-конуп, убактынчалуу жашап турабыз. Жакын арада жер бөлүп берсе ошол жакка көчүп барабыз да»,- деди Үсөн Төрөкулов.
Барак айылындагы социалдык обьектилериден бир гана айылдык мечиттин имараты бузулган эмес, калган социалдык обьектилердин баары бузулуп, 15-апрелге чейин 97 турак жай жана 8 социалдык обьектилер бузулуп, толук көчүрүлүп чыккан.
Жергиликтүү бийликтен билдиришкендей, Барак эксклавынын аянты 208 гектар болгондуктан аларга 208 гектар жер бөлүнгөн. Ала-Тоо айыл аймагынан мурда кабарлашкандай, жаңы айыл Андижан-Маале аймагы жакка курулат.