Кара-Кулжа районунда-гы эң ири аймактардын бири Кара-Кулжа айыл өкмөтүнө иш сапар менен барганбыз. Аталган айыл өкмөттүн башчысы Батыров Каныбек Маришовичке жолугуп, мындагы аткарылып жаткан жумуштар туурасында баарлашып кайтканбыз.
Аймак жөнүндө
Кара-Кулжа айыл өкмөтү учурда аймактык-административдик түзүлүш реформасын ишке ашырууда райондогу эң чоң аймактардан болгондуктан эч бир айыл өкмөт менен бирикпестен, өз алдынча калган. Мунун алкагында аймакта 27 миңден ашуун тургун жашайт. Кара-Кулжа айыл өкмөтү райондун борборунда жайгашкандыктан конуштар тыгыз орун алган. Калктын дээрлик көпчүлүгү жеке ишкердик жана айыл чарбачылыгы менен алектенишип, миграциянын агымы да дурус эле. Учурда жайыт комитеттери айыл өкмөттүн балансына өткөн. Мунун алкагында жайыт комитетинен өткөн таштанды таштоочу жайларга, беккери чуңкуру жайгашкан аянттарга күндөн энергия алуучу видеокөзөмөл жабдыктарын орнотушкан.
Айыл өкмөттүн алдында түзүлгөн тазалык жана таза суу муниципалдык ишканасы иштеп келет. Эми сугат суу пайдалануучулар ассоциациясын да бириктирүү жолдору каралып жатканын айтат Каныбек Маришович.
Арбындуу аракеттер
Калкты жайлоого көчүрүү кызуу жүрүп жаткандыктан, жайлоого барчу жолдор оңдолуп, көчкөн калкка ыңгайлуулук жаратуунун үстүндө тыкыр иштер алынып барылууда. Тоолуу аймак болгондуктан табигый кырсыктардын алдын алууда айыл өкмөттүн балансында турган оор техникалар ар дайым жумушка тартылууга даяр турат. Облустук өнүктүрүү фондуна оор техникаларды алуу боюнча долбоор өткөрүшкөн. Эгер ал техника алынып калса, айыл өкмөттүн техникалык базасы кыйла чыңдалып калаарын айтат жетекчи.
Жакында нөшөрлөп жааган жамгырдын кесепетинен сел кетип, ыкчам көрүлгөн чаралардын негизинде эки жээкти бириктирген чоң көпүрөнү сел алуу коркунучунан сактап калышкан. Көпүрөнүн урап калган жерлерин алдын ала курулмаларын жасашып, сынган, оюлган жерлерин ремонттон өткөрүшкөн. Эгер ал иштер аткарылбаса жайлоого көчкөн калкты кыйла кыйноого салып, элдин тиричилиги токтоп калмак, ал көпүрө калктын жашоосуна чоң мааниси бар экенин жетекчи айтып өттү. Учурда ири үч долбоор ишке ашаар алдында турат. Ал долбоор республикалык дем берүүчү гранттан каражат ажыратылары күтүлүүдө. Аталган долбоорго Э.Осмонов атындагы орто мектептин чатырын алмаштыруу, Алиев көчөсүнүн эки тарабына тротуар жасоого, 1-Май айылына кичи футболдук аянтча куруу камтылган.
Ал эми райондук өнүктүрүү фондуна эки долбоор өтүп, анын бири ишке ашкан. Мындайча айтканда Эшмамбетов атындагы орто мектептин алдына брусчатка басылып, айбанчасы оңдоодон өткөн. Ал эми экинчи долбоор Бел участкасындагы сугат сууну натыйжалуу пайдалануу, кайрак болуп калган жерлерге сугат сууну үзгүлтүксүз жеткирүү боюнча иштер жүрүп жаткандыктан, сугат суу мезгилине карата иштер аягына чыккан.
Каныбек Батыров АРИС прогарммасы менен да тыгыз иштешип келүүдө. Бул программа аркылуу Сейил балдар бакчасынын чатыры жаңыланып, эшик алдына брусчастка басылып, айланасын заманбап тосмо менен тосуп беришкен. Ал эми ушул эле программанын алкагында Самидинова атындагы көчөнүн бир километр жолуна асфальт басуу иштери алынып барылмакчы. Ошондой эле, Сары-Камыш айылына жеке ишкер чакан ишкана ачуу алдында турат. Мындай ишкерлерди колдоого ар дайым даяр экенин айтат аймак башчысы.
Кара-Кулжа айыл өкмөтүнүн бардык жаңы конуштарына электр зымдарын тартуу, суу түтүкчөлөрүн орнотуу иштери алынып барылууда. Аймак боюнча 95 пайыз таза суу менен камсыз болушкан. Таза суу тартыштыгын болтурбоо максатында Кореянын КОИКА долбоору аркылуу жана облустук, райондук өнүктүрүү фондунун каржылоосунда скважина курулуп, пайдаланууга берилген.
Ошондой эле Сары-Камыш айылындагы Ормокеев атындагы орто мектебине балдар үчүн китепкана жана ашкана курулуп берилген. Ашкананын бардык жабдыктары жана китепкананын эмеректери толук алынып берилген. Бул жумуштар жергиликтүү бюджеттен ишке ашкан.
Бюджет 20 млн.го көбөйгөн
«Негизинен иштейм деп келгенден кийин жакшы иштеп, артыбыздан жакшы сөз, жылуу пикир калса деген изги тилек менен иштеп жатабыз да. Элибиздин жашоо-шарты жакшырса, айылдарда тиричилик жолдору оңолсо деген жакшы ниеттемин. Ири долбоорлорду тартып, аймакты дотациядан чыгарууга болгон аракетибизди жумшап жатабыз»,- дейт Каныбек Маришович.
Чындыгында айыл өкмөт башчысы кызматында такшалган тажрыйбасы бар Каныбек Батыров айыл өкмөттүн жергиликтүү бюджетин 56 млн. сом менен кабыл алса, жыл аягында 76 млн. сом менен жылды жыйынтыкташкан. Мыйзамсыз иштердин бетин ачып, салыктан качып жүргөндөрдү төлөтүп, эски карыздарды өндүрүп, мунун алкагында дотациядан чыгууга шай турушат. Бул жумуштар албетте, иштейм деген жетекчинин эмгегинин натыйжасы деп билебиз.
Билим берүү мекемелерине көп көңүл бурган Каныбек Баатыров бардык мектептерге видеокөзөмөл орнотуп берген. Кыска мөөнөттү балдар бакчаларын ачууга бир топ долбоорлор ишке ашуу алдында тураарын айтат ал. Балдар бакчаларына септик орнотулуп, канализация тартылып, бакчалардын санитардык абалдары жакшырууда. Мындай жумуштар аткарылып, пайдаланууга берилсе, кээ бир жумуштар кызуу жүрүүдө. Мектептерге да жакшы шарттарды жаратуунун үстүндө план-программаларды түзгөн Каныбек Баатыров билим берүү тармагын колдоону күчөтүү зарылдыгын айтат.
«Чындыгында аймакта көйгөй көп экен. Мурунку иштеген жериме караганда Кара-Кулжа айыл өкмөтү эки эсеге чоң аймак. Жетекчи болуп келгенимден бери уйку бетин деле көрбөдүм окшойт. Чечилүүчү маселелер деле чечилбей, үйүлүп кеткенин байкадым. Чындыгында таң калып бүтө албай жатам. Эмнеге ушул жумуштарды аткарып коюшкан эмес деген таң калуумду жашыра албайм», -дейт жетекчи.
Кыскаруудан кийинки кызматтар
Административдик-аймактык түзүлүш реформасынан кийин штаттык бирдик эки эсеге кыскарган. Учурда 13 кызматкер иштесе, калган кызматкерлерди келишимдин негизинде жумушка тарткан.
«Жооптуу катчы менен орун басардын кызматын бириктирип салган. Чындыгында оор болуп калат экен. Эки кызматтын аткарган функциясы көп мээнетти талап кылат. Ошондуктан кайрадан штаттык бирдикти карап чыгууларын тиешелүү органдарга кайрылып жатабыз. Биздин аймак чоң болгондуктан, келишим менен кызматкерлерди ишке албасак, жетишпей калаарыбыз белгилүү. Бул нерсе албетте, иштин кызыкчылыгына байланыштуу», -дейт айыл өкмөт башчысы.
Айыл өкмөт башчысынын орун басары Нургазы Апаев, ал эми ФЭБ бөлүмүндө Асылбек Алмабашев, Абдылда кызы Перизат, Венера Маматалиева эсеп-кысапты так жүргүзгөн мыкты эсепчилер. Жумабек уулу Чыңгызкан жерге жайгаштыруу жана айыл чарбасы боюнча жетектөөчү адис болсо, Айсулуу Мойдунова коомдук-коопсуздук боюнча башкы адис кызматында иштеп келүүдө. Аскердик эсепке алуу инспектору Жетимиш Сайтөлөков, соцкызматкер Турдумамат Эргешов да аймактын мыкты кызматкерлери. Мындагы жалпы аппарат кызматкерлери мол тажрыйбага ээ кадрлар болсо, арасын жаш кадрлар да толуктап келүүдө. Ынтымактуу жамааттын жетишкен ийгиликтери арбын. Белгилесек, 2024-жылдын биринчи кварталында аткарылган иштерге кыскача токтолуп өттүк.
Автор: Н.Өмүрзакова.