Германиядан өтүп жаткан футбол боюнча Европа чемпионатынын чейрек финалчыларынын баары маалым болду. Кечээ, 2-июль күнү түнү акыркы жуптук-Түркия курамасы менен Австрия курамасы ойноп, натыйжада түрктөр чейрек финалга жолдомо алышты.
3-июлга караган түнү Нидерландия менен Румыния, Түркия менен Австрия ойноду. Оюндун жыйынтыгында Голландия курамасы Румынияны 3:0 эсебинде (голдор: Коди Гакпо, Дониелл Мален-дубл) утту.
Түркия курамасы футболчу Мерих Демиралдын эки голунун эсебинен Австрияны жеңип алды. Ошентип Европа чемпионатынын бардык чейрек финалчылары белгилүү болду.
Буга чейин Германия, Испания, Франция жана Португалия курамалары чейрек финалга чыккан.
Жарым финал жолдомосу үчүн төмөнкү курамалар ат салышат.
Испания курамасы менен Германия курамасынын оюну 5-июль күнү Бишкек убактысы боюнча саат 22:00дө башталат. Португалия менен Франция 5-июлдан 6-июлга караган түнү Бишкек убактысы боюнча 1:00дө ойношот. Ал эми Англия менен Швейцариянын оюну 6-июль күнү Бишкек убактысы боюнча 22:00дө башталса, Голландия менен Түркиянын оюну 6-июлдан 7-июлга өткөн түнү саат 1:00дө орун алат.