Кара-Суу райондук мамлекеттик администрация 15-июлдун саат 20:00гө карата район боюнча селден кийинки жалпы маалыматты берди.
Маалыматка караганда, селден район боюнча 742 турак-үй жабыркаган болсо, анын ичинен 423 үйдүн короосун, 319 үйдүн ичин сел каптаган. 2024-жылдын 15-июлу саат 20:00гө карата 294 үйдүн жер төлөсү жана ичи, 369 үйдүн короосу; жалпы 663 үй сел сууларынан тазаланды.
Мамлекеттик Камсыздандыруу Уюмунун Кара-Суу районундагы инспектору тарабынан бүгүнкү күнгө карата камсыздандыруудан өткөрүлүп, селден жабыркаган 10 турак-үй аныкталды. Алар боюнча акт түзүлүп, компенсация төлөп берүү боюнча иштер жүргүзүлөт. Аныктоо, тактоо иштери 16-июль күнү да уланмакчы.
Ошондой эле район аймагындагы 9 социалдык объект селден жабыркаган. Алар: 4 мектеп, 2 оорукана, 1 ФАП, 1 музей, 1 балдар бакчасы. Аталган социалдык объекттердин баары билим берүү, саламаттыкты сактоо жана маданият кызматкерлери тарабынан сел сууларынан тазаланды. Кыргыз-Чек айылындагы Сыдык Алайчы атындагы мектептин жер төлөсүн селден арылтуу иштери уланууда. Ошондой эле сел кесепетинен 31 автоунаа, 4 көпүрө, 9 электр мамычасы жана 16,75 га эгин аянты жабыркаган. 6500 абонент электр жарыгысыз калган. РЭТ тарабынан 9 электр мамычасы орнотулуп, 6500 абонентке электр энергиясын берүү толук калыбына келтирилди.
14 мал жандыкты сел агызып жоголгон болсо, райондук ветеринария башкармалыгынын кызматкерлери тарабынан 11инин өлүгү табылып, зыянсыздандырылып көмүлдү. Бир баш жандык тирүү калган. Калганын издеп табуу иши 16-июлда уланат.
Сел кесепеттерин жоюу иштерине ӨКМдин 235 кызматкери, 17 инженердик техникасы, 19 мотопомпасы; Жергиликтүү бийликтин 809 кызматкери, 27 инженердик техникасы, 17 мотопомпасы тартылган.
Таза суу берүү үзгүлтүккө учураган Ачы, Торгой-Булак жана Достук айылдарына ӨКМ тарабынан таза суу жеткирилип турду.