Акыркы учурда мугалимдердин маяналары көтөрүлүп, эмгек өргүү акысын да жогору төлөнүп жатат. Ош облусунда былтыркыга салыштырмалуу эки эсе жогору эмгек өргүү акысын алган мугалимдердин саны арбын. Алардын бири Ош облусунун Алай районунун Сары-Таш айылындагы №39 Келдибай Эсенов мектебинин мугалими Нурзина Боронова. Ал быйыл 213 миң эмгек өргүү акысын алган.
«Мугалимдик тажрыйбам 14 жыл. №39 Келдибай Эсенов мектебинде иштегениме 12 жыл болуп калды. Өзүм орус тил жана адабият сабагынан окутам. Жашым 36да, жолдошум менен 13 жылдан бери чогуу жашап, 5 баланы тарбиялап келебиз — 2кыз, 3 уул. Эмгек өргүүмдүн акысынын июнь айлыгы менен чогуу 213 миң сом алдым. Былтыркы жылы 57 000 миң сом айлык алат элем, быйыл 66 500 сом айлык маяна алып жатам», деди Н. Боронова.
Ошондой эле Араван районун Кичи-Алай айылындагы №25 Тургунбай Осмонов орто мектебинин мугалими Гүлмира Мурзалиева июнь айынын маянасы менен бирге 145 миң сом эс эмгек өргүү акысын алган.
« № 25 Тургунбай Осмонов мектебинде 12 жылдан бери иштеп келем. Англис тил сабагынан балдарды окутуп келем. Айлык менен кошо 145 миң сом акы алдым. Алган акчамы үй-бүлөгө жумшайбыз деп жатабыз, үйгө керектелүүчү буюмдарды алдык. Жолдошум экөбүз 18 жылдан бери чогуу жашайбыз. 4 балабыз бар — 1 уул, 3 кыз. Айлык көтөрүлгөнгө чейин эмгек өргүү акысын 80 миң сомдун тегеринде алат болчумун», — деди ал.