Бокс боюнча 57 кг салмактык чен бирдикке чейинкилер арасында Париж Олимпиадасында коло медалды нак кылып койгон Мунарбек Сейитбек уулунун атасы Сейитбек Токтосунов уулунан жеңиш гана күтүп жатканын айтты. Бул тууралуу «Турмуш» басылмасы жазды.
- Мунарбек Сейитбек уулу Париж Олимпиадасынын Кыргызстандын бокс курамасынын жалгыз катышуусу. Бокс боюнча Кыргызстан бир гана лицензия уткан.
Ал кошумчалагандай, жарым финалдык беттеш орун алганда өзгөчө толкунданганын, эски тааныштарынан бери телефон чалып куттуктаганын белгиледи.
«Мунарбек жаштайынан эле өзүнө өтө тың бала эле. Аракет кылып, спортко кызыгуу менен барып, машыгып жүрчү. Машыгууларынын арты менен жакшы ийгиликтерге жетишти. Тынымсыз машыгуулары-татыктуу мөмөсүн берди десем болот. Көп беттештерде жеңип, мыкты жетишкендиктерге жетишти.
Жарым финалга чыккан учурда эмне болот, кандай болот деп толкунданып, ойлонот экенсиң. Жакшы, ийгиликке жетишти. Өзүнө ишеничтүү болуп, жеңди. Чемпион болуп калса баарыбыз кубанабыз. Анан калса азыртан эле эски тааныштардан бери мага чалып, куттуктап жаткандар көп. Ушунча элдин ишеничин актап, алтын медаль алат деген үмүт бар»,- деди ал.
Мунарбек Сейитбек уулу Ош шаарынын Манас-Ата муниципадык аймактык башкармалыгындагы (ХБК кичи району) Уркуя Салиева көчөсүндөгү көп кабаттуу үйлөрдүн биринде чоңойгон. Ал жашынан эле өзү жашаган аймактагы бокс залына барган.
Сейитбек уулу жарым финал үчүн мелдеште армерикалык боксчу Жамал Харвини утуп, жарым финалга жолдомо алган. Мунарбек кийинки беттешин 8-август күнү болгариялык боксчуга каршы өткөрөт.