Кыргызстанда туулган Айбек Кубанычбек уулу Орусиянын аскер бөлүктөрүнүн бири менен келишим түзүп, бир нече күндөн кийин кайрадан согушка аттанат. Мындай маалыматты «Петя Первы» телеграм каналы жазды.
Айбек Кубанычбек уулу Орусиянын жарандыгын алганы белгилүү болду.
Ал орус-украин согушуна орус аскерлери тараптан катышкан. Кыргызстанга келгенден кийин УКМК тарабынан кармалып, убактылуу кармоочу жайга киргизилген. Сот аны КР Кылмыш-жаза кодексинин 416-беренеси («Жалдануучулук») боюнча күнөөлүү деп таап, 10 жылга эркинен ажыратуу чечимин чыгарган.
Кубанычбек уулу кийинчерээк орус ЖМКлары аркылуу Орусиянын бийлигинен ага жарандык берүү боюнча жардам сураган.
2023-жылдын 30-августунда Жогорку сот Биринчи май райондук сотунун 16-майдагы жана Бишкек шаардык сотунун 7-июндагы өкүмдөрүн жокко чыгарып, аларды биринчи инстанциядагы башка курамдагы соттордун кароосуна жөнөткөн.
Ушул жылдын 24-январында Биринчи май райондук соту Кубанычбек уулуна карата чыккан өкүмдү өзгөрткөн. Ал жалдануучулук беренеси боюнча күнөлүү бойдон калып, 10 жылга эмес, 7 жылга камакка алуу чечими чыккан. Бирок, кайра 3 жыл пробациялык көзөмөлгө алуу чарасын колдонуп, эркиндикке чыгарган. Ал камактан бошотулгандан кийин Орусияга кеткен.