Мунарбек Сейитбек уулу Париж Олимпиадасында күмүш байге алганы үчүн Эл аралык бокс федерациясынан (IBA) 25 миң АКШ долларын алат. Бул тууралуу аталган федерациянын басма сөз кызматы кабарлады.
Маалыматка карагандай, жалпы 50 миң доллар сый акы берилет. Анын 25 миң доллары Мунарбек Сейитбек уулуна, 25 миң доллары машыктыруучусу менен улуттук бокс федерациясынын ортосунда тең бөлүштүрүлөт.
Жеңүүчүлөр допингге каршы тиешелүү процедураларды ийгиликтүү аяктагандан кийин Эл аралык бокс федерациясынын акчалай сыйлыктарына ээ болушат.
Мунарбек Сейитбек уулу Париж Олимпиадасында бокс боюнча 57 кг чейинки салмак даражада өткөн мелдеште 2-орунду алып, күмүш медаль тагынган. Бул ийилиги үчүн мамлекет ага 10 млн сом жана «Киа EV 9» автоунаасын берген. Ошондой эле мушкердин машыктыруучулар курамына, дарыгерлерге акчалай сыйлыктар тапшырылган.
Сейитбек уулу Ташкентте өткөн бокс боюнча дүйнөлүк чемпионатта коло медаль утканы үчүн мамлекет ага Ош шаарынан 2 бөлмөлүү батир берген.