16-августта Президенттин Ош облусундагы ыйгарым укуктуу өкүлү Э.Н.Джантаев Ноокат районуна иш сапары менен барып, жүргүзүлүп жаткан жолдорду оңдоо жана Чили-Сай көпүрөсүн куруу, иштери менен таанышты. Бул тууралуу өкүлчүлүктүн басма сөз кызматы билдирди.
Маалым болгондй, текшерүүнүн алкагында жолду оңдоо жана кеңейтүү этаптары менен таанышып, иштин темпин тездетүү зарылдыгын белгиледи.
«Биз жолду оңдоо иштерин сапаттуу жана өз убагында бүтүрүшүбүз керек, бул иш тургундардын тынчын албашы керек, андыктан калктуу пункттар аркылуу айланып өтүүчү каттамдарды уюштуруу зарыл», — деген ал.
Ошондой эле ыйгарым укуктуу өкүл Ноокат шаарынын борбордук айланма жолунда болуп, оңдоо иштеринин жүрүшү менен таанышып, долбоорлорду ийгиликтүү бүтүрүү үчүн архитекторлор менен куруучулардын аракеттерин координациялоо боюнча тапшырмаларды берди.
«Чили-Сай көпүрөсүнүн курулушуна өзгөчө көңүл бурулду. Ыйгарым укуктуу өкүлү көпүрөнүн бүткөрүлүшү аймактын транспорттук инфраструктурасын өнүктүрүү үчүн өтө маанилүү экенин белгилеп, ишти тездетүүнү талап кылды. Мындан улам өкүл асфальт төшөө учурунда жол кыймылына мүмкүн болуучу тоскоолдуктарды болтурбоо боюнча чараларды да сунуштады»,- деп айтылат маалыматта.
Сапардын маанилүү учуру Гүлистан айылынын тургундарынын коопсуздугун камсыздоо маселеси болду. Селдин таасири болушу мүмкүндүгүнө байланыштуу кооптуу аймакта жайгашкан үйлөрдү коопсуз жайларга көчүрүү тапшырмасын берди.
Иш сапардын жыйынтыгында аныкталган көйгөйлөрдү тез арада жоюу жана коюлган тапшырмаларды сапаттуу аткаруу боюнча подряддык уюмдарга жана жергиликтүү бийлик органдарына конкреттүү тапшырмалар берилди.