Украинанын Куралдуу күчтөрү Орусиянын Курск облусундагы 92 калктуу пунктту көзөмөлгө алды. Бул тууралуу Украинанын президенти Владимир Зеленский чет өлкөлөрдүн дипломатиялык өкүлчүлүктөрүнүн жетекчилери менен жолугушуу учурунда айтты.
«Украинанын аскерлери Курск облусундагы райондордо коргонуу операциясын улантып жатышат. Учурда биздин күчтөр душмандын 1250 квадрат километр аянтын жана 92 калктуу пунктун көзөмөлдөп турат»,- деген Зеленский.
Зеленский белгилегендей, учурда украин Куралдуу күчтөрү позициясын бекемдеп, орус туткундардын санын көбөйтүүдө. Алдыда ал туткундарды украиналыктарга айырбаштоо планы бар.
Украинанын Куралдуу күчтөрү Курск облусуна 6-августта чабуул кылып баштаган. Бул аймакта 9-августта федералдык деңгээлдеги өзгөчө кырдаал режими жарыяланган болчу.