«Мурас Юнайтед» клубунун жана Кыргызстандын футбол боюнча курамасынын оюнчусу Мирбек Ахматалиев футбол менен байланышкан бардык иштерден 5 жылга четтетилди. Бул тууралуу Кыргыз футбол биримдиги кабарлады.
Маалыматка караганда, Кыргыз футбол биримдигинин атына «Мурас Юнайтед» футболдук клубунун жетекчилигинен кат келип түшүп, анда машыктыруучулар штабы жана клубдун спорт директору иштен алынганы айтылган. Анын себеби, ушул жылдын 15-август күнүндө Бишкектеги «Сельмаш» стадионунда команданын машыгуусу учурунда клубдун оюнчулары катышкан чыр чатак орун алган, андан улам клубдун чет элдик оюнчусу (легионер) Евгений Терзи жаракат алып, тагыраагы жаагы сынган. Аталган окуянын демилгечиси клубдун оюнчусу Мирбек Ахматалиев болуп чыккандыктан, клуб бул оюнчу менен эмгек мамилесин токтотууну чечкен.
«2024-жылдын 22-август күнүндө Кыргыз футбол биримдигинин Дисциплинардык комитетинин отуруму орун алып, анда «Мурас Юнайтед» клубунун өйдөдө белгиленген кайрылуусу каралды. КФБнын Дисциплинардык комитети тартип бузуу жөнүндөгү иштин чоо-жайы менен таанышып, КФБнын Дисциплинардык кодексинин №118 беренесине ылайык, Мирбек Ахматалиевди футболго тиешелүү баардык ишмердүүлүктөн 5 жылга чететтүү чечимин кабыл алды»,- деп айтылат маалыматта.
Олимпиадалык спорт түрү катары футбол адилеттүү спорттук күрөш жана атаандаштарына жана командачыларына урмат көрсөтүү принциптерине негизделген. Ал командалык рухту тарбиялоого, адамдык оң сапаттарды өркүндөтүүгө, ошондой эле адилеттүүлүк жана жоопкерчилик сезимин өрчүтүүгө багытталган.
Кыргыз футбол биримдиги жогоруда айтылган баалуулуктардын жактоочусу катары, агрессия жана зордук-зомбулук көрсөткөн деструктивдүү аракеттерди бир беткей айыптайт. Агрессия жана зордук-зомбулук, физикалык же эмоционалдык жактан зыян келтирүүгө жөндөмдүү, андыктан таптакыр кабыл алынгыс болуп саналат.
Мирбек Ахматалиев 1994-жылы Баткен облусунун Кадамжай районунда туулган. Профессионалдык карьерасын «Динамо-МВД» клубунда ойноо менен баштап, «Абдыш-Ата», «Алай, «Дордой», «Алга» сыяктуу клубдарда ойногон. Ушул жылдын июль айында «Абдыш-Ата» клубунан «Мурас-Юнайтед» клубуна өткөн болчу.