16-августта Бишкек шаарынын Биринчи май райондук соту Исламбек менен Руслан Матраимовдорго өкүм чыгарды.
Райондук соттун басма сөз кызматы билдиргендей, бир туугандар Кылмыш-жаза кодексинин 41-218-беренеси (Мыйзамсыз ишкердик же банктык ишке катышуу) боюнча күнөөлүү деп табылып, ар бири 50 миң сом айып пул төлөөгө милдеттендирилген.
Билдирүүдө бир туугандар күнөөсүн моюнуна алганы айтылат.
«Күнөөсүн моюнуна алып, материалдык зыяндын ордун толтуруп бергенде сот эркиндиктен ажыратуу менен байланышпаган жаза тандайт»,- деп айтылат билдирүүдө.
Буга чейин Кара-Суу райондук соту Тилек Матраимовду «Кызмат абалынан кыянаттык менен пайдалануу» беренеси боюнча күнөөлүү деп, 1 млн сом айып пул төлөөгө милдеттендирип, мамлекеттик жана муниципалдык кызматты 3 жылга чейин ээлөө укугунан ажыраткан. Ал эми Ош облустук соту айып пулду 300 миң сомго чейин кыскартып, 3 жылга чейин мамлекеттик жана муниципалдык кызматта иштөө укугунан ажыраткан бөлүктү алып салган.
Райымбек Матраимовго соттун өкүмү чыга элек.