Сүрөт: «Турмуш» басылмасы
Ош шаарындагы «Калпак English Academy» тил курсунун башчысы- АКШнын жаранын опузалап акча талап кылуу фактысы боюнча Ош ОИИБдин ыкчам кызматкери К.И.А. «Кылмышты жаап жашыруу» беренеси боюча күнөлүү деп табылып, 50 миң сом айып төлөөгө кириптер болду, деп жазат «Турмуш» басылмасы.
Ош облустук сотунун басма сөз кызматы «Турмуш» басылмасына билдиргендей, Ош шаардык сотунун 2024-жылдын 27-августундагы өкүмүнүн негизинде К.И.А. КР Кылмыш-жаза кодексинин 208-беренесинин 2-бөлүмүнүн 3,4-пункттарында (опузалап талап кылуу) кылмышты жасоодо күнөөсүн тастыктоочу далилдердин жетишпегендигинен, айыпталуучунун жосунунда кылмыштын курамы жок болгондуктан акталган.
«КР Кылмыш-жаза кодексинин 367-беренесинин 1-бөлүмү (кылмышты жаап жашыруу) менен күнөөлүү деп табылып, ал боюнча 500 эсептик көрсөткүчтө, башкача айтканда 50 000 сом айыпка кириптер кылынган. Жабырлануучуга таандык 5 000 АКШ доллары тил кат аркылуу кайтарылып берилген»,- деп айтылат маалыматта.
Өкүмгө нааразы тарап Ош облустук сотуна апелляциялык тартипте даттанууга укуктуу.
Буга чейин аталган АКШ жараны Братчер Ноах Жон АКИпресс-Ошто маалымат жыйын берип, жарандык никедеги кызы менен урушуп кеткенден кийин ал Ош ОИИБдин ыкчам кызматкери менен бирге андан ири суммадагы акча сураганын билдирген болчу.