Бүгүн, 29-август күнү Ош облусунун ички иштер башкармалыгына караган түзүмдөрдө Кыргыз Республикасынын Эгемендүүлүгүнүн 33 жылдыгына жана 1-сентябрь — Билим күнүнө арналган майрамдык иш-чараларга карата саптык кароо өткөрүлдү. Бул тууралуу Ош ОИИБдин басма сөз кызматы билдирди.
Маалыматка караганда, Ош облусунун аймагында майрамдык салтанаттарда коомдук коопсуздукту камсыз кылууга 1000 (миңден) ашуун кызматкер тартылат.
Ага жер-жерлерде райондук мамлекеттик администрациялардын жетекчилиги, ардагерлер, коомдук алдын алуу борборлорунун мүчөлөрү жана башка мамлекеттик кызматтардын өкүлдөрү катышты.
«Саптык кароодо кызматкерлердин, кошумча резервдик күчтөрдүн, ыкчам-тергөө топтордун жана кызматтык автоунаалардын кызматка даярдыгынын абалы текшерилди.Кызматкерлерге жетекчилик тарабынан жарандардын коопсуздугун жана жол кыймылынын коопсуздугун жогорку деңгээлде камсыз кылуу, кызматтык тартипти жана мыйзамдуулукту бузбоо, жарандарга сылык мамиле жасоо тууралуу нускама берилди»,- деп айтылат маалыматта.
Эске салсак, Ош облусунун ички иштер башкармалыгынын кызматкерлери 2024-жылдын 17-августунан тартып күчөтүлгөн кызмат өтөө тартибине өтүшүп, 26-28-август күндөрү “Укук тартип”, “Арсенал”, “Нелегал”, жана “Селсаяк” аталышындагы комплекстүү алдын алуу ыкчам иш-чарасын өткөрүштү.