Бүгүн, 29-август күнү Ош шаардык кеңешинин 32-сессиясы өттү. Күн тартибине 11 маселе коюлду.
Анда Ош шаардык мэриясынын ипотекалык ишканасынын уюштуруучулук-укуктук формасын муниципалдык ишканадан акционердик коомго өзгөртүү жөнүндө маселе каралууда.
Анда депутаттар эмне үчүн муниципалдык ишканадан акционердик коомго өзгөртүү боюнча маселеси коюлуп жатканын сурашты.
Аталган ишкананын жетекчиси Кутманалы Абдрахманов бул башкаруу формасы ишканага эркиндик берерин, мында муниципалдык ипотекалык программага доо кетпестигин билдирди.
«Бул маселе 1,5 жылдан бери талкууланып жатат. Комитеттик жыйында да талкууладык. Бүгүн Мамлекетик ипотекалык компания акционердик коом. Биз да акционердик коом башкаруу формасына өтөлү деп атабыз. Акционердик коом болсо , Ош шаардык мэриясына баш ийген ишкана боюнча калат. Жергиликтүү бюджетке дивиденд төлөсө болот»,- деди ал.
Депутат Жыргалбек Тажибаев эгер ишкана акционердик коом болсо, канча мүчөсү болоруна кызыкты.
Кутманады Абдрахманов буларды айтты.
«Акционердик коомго өтсөк , биздин долбоор боюнча 100 пайыз акциянын ээси Ош мэриясы болот. Азырынча жеке адамдарга, башкаларга акция берүү каралган эмес. Ош шаардык мэриясы түзүүчүсү катары бардык акциялардын ээси мэрия болот»,- деди ал.
Депутат Айгуль Салиева муниципалдык ипотекалык ишкана элдин акчасына түзүлгөнүн билдирди.
«Бул муниципалдык ипотекалык ишкана июнь коогасында курулган үйлөрдөн түшкөн каражатка түзүлгөн. Тактап айтканда, бул элдики. Эгер акционердик коомго өтсөңөр, 483 батирдин акчасын бюджетке коюп койгула»,- деди ал.
Кутманалы Абдрахманов өз кезегинде акцияларды бөлүштүрүүнү бөгөттөө тууралуу маселеге Ош шаардык кеңеши бөгөт коюп койсо болорун айтты.
«Бул жерде ишкананын башкаруу формасы өзгөрөт. Ишкананын аталышы өзгөрбөй калышы деле мүмкүн. Акционердик коомго өткөндөн кийин акциялардын ээси мэрия болот. Азыр бул жерде акцияларды бөлүштүрүү маселеси каралган жок. Кааласаңар акцияларды бөлүштүрүү маселесин бөгөттөп койсоңор болот»,- деди ал.
Депутат Болот Баетов муниципалдык ишкана бюджетке акча түшүрсө мыйзамсыз болуп каларын, АОК болсо бюджетке акча түшүрүү мыйзамдуу болуп каларын айтты.
«Кутманалы Абдурахманович, муниципалдык ишкана ААК өзгөрсө бюджетке акча түшүрүү жагынын механизмин айтсаңыз. Депутаттар түшүнбөй жатат»,- деди ал.
Кутманалы Абдрахманов эгер муниципалдык ипотекалык компания пайда алып, бюджетке акча төгүш үчүн үйдү бүтүрүп, пайда деген 10 пайызды төгүп анан калган акчаны бюджетке төксө болорун айтты.
«Эгер ААК болсок квартал сайын отчетторду чыгарып, шаардык бюджетке дивиденд бергенге болот»,- деди ал.
Депутат Медер Абдыманапов тендер көйгөйүнө кабылбаш үчүн ушундай өзгөртүү болуп жатканын белгиледи.
«Сиз жанагы шылуун компанияларга тендерде алданып калбаш үчүн өзгөртүүгө бара жатасыз. Эгер ААК болсо, лицензия алып, ишкана өзүңөр үй курганга боло турган кылып жатасыз. Бул жакшы, мыкты чечим. Бирок, эгер өзүңүз үй куруп калсаңыз «монстр» болуп каласыз»,- деди ал.
Кутманалы Абдрахманов ишкананы башкаруу формасын, механизмдерин шашпай, талкуулап, токтом менен бекитип койсо болорун билдирди.
Кашкар-Кыштак айылдык кеңешинен Ош шаардык кеңешине өткөн депутат Дилмурат Рахманов аталган ишкана ААКка өтсө КРдин «Акционердик коом» жөнүндөгү мыйзам менен иштейби?» деп сурады.
Кутманалы Абдрахманов эгер муниципалдык ишкана ААКка өтсө , башкаруу формасы толук өзгөрөрүн, акциянын толук ээси катары мэрия гана чечим кабыл аларын билдирди.
Суроо жана сунуш, тактоолордон кийин аталган маселенин токтом долбоору добушка койду.
Натыйжада 18 депутат «макул» 9 депутат «каршы» деген добуш берип, токтом долбоору өткөн жок.