Бүгүн, 29-август күнү Ош шаардык кеңешинин 32-сессиясы болуп, күн тартибине 11 маселе коюлду.
Депутаттар түштөнүүгө чейин 6 маселенин токтом долбоорун кабыл алып беришти.
Түштөнүүдөн кийин «Биздин Кыргызстан» фракциясынан депутат Айбек Таалайбек уулу кворум болбой калганын айтты:
«Урматтуу төрага, 49 депутат менен сессияны баштап жибердик. Кворум жок эле. Эми бул маселе боюнча кечирим сурап коюңуз. Анда бүгүнкү кабыл алынган токтомдор жок го чыгыш керек»,- деди ал.
Депутат Бекболот Арзибаев түштөн кийин мындай маселени көтөрбөй, убагында айтышы керектигин эске салды. Айрым депутаттар кворум жок болсо, түшкө чейин бул маселе көтөрүлүшү керектигин айтышты.
Кээ бир төрага 61 депутат катышып жатканын, кворум боюнча сураганда бардык депутаттар макул болгонун айтышты.
Төраганын орун басары Шайырбек Нуранов кворум болбой калган болсо, буга чейинки чыккан токтомдорду жокко чыгаруу керектигин айтты.
«Болбосо сурамжылоо жолу менен бүгүнкү маселелерди бүтүрөлү. Болбосо кворум жок деп туруп, түштөнүүгө чейинки токтомдорду жокко чыгаралы»,- деди ал.
Биринчи вице-мэр Марс Асанов мыйзам талаасына кайтып, сурамжылоо жолу менен болсо да токтомдорду кабыл алып берүүсүн депутаттардан суранды.
Төрага Салман Назылбеков талаш-тартыш жаралып, бүгүнкү 10 маселе чечилбей каларын, анан калса шайлоо боюнча маселе тездик менен чечилиши керектигин билдирди.
Депутат Айбек Таалайбек уулу кайрадан сөзгө аралашып, түштөнүүгө чыккан учурда тиешелүү адамдардан сураганын, алар «49 депутат катышты» деп айтканын, андыктан кворум болбогонун, бүгүнкү жыйын жокко чыгыш керектигин айтты.
Төрага Салман Назылбеков кворум жоктугуна байланыштуу түштөн кийинки сессияны жабык деп жарыялады.
Жыйындан кийин төрага Салман Назылбеков кворум болуш үчүн саат 10го чейин депутаттарды күткөнүн, сессияга 61 депутат катышканын айтты.
Ал ошондой эле түштөнүүгө чейин 6 маселе боюнча токтом долбоору кабыл алынганын, калганы кворум жок кабыл алынбай калганын кошумчалады.