22-сентябрда таланттуу вокалист, А. Малдыбаев атындагы Кыргыз улуттук опера жана балет театрынын хор артисти, Кыргыз Республикасынын эмгек сиңирген артисти Абдубачаев Рысбек Исмаилбекович узакка созулган оорудан кийин дүйнөдөн кайтты, деп билдирди Маданият министрлигинин басма сөз кызматы.
Маалым болгондой, Рысбек Абдубачаев 1961-жылдын 30-январында Фрунзе шаарында кыргыз театр искусствосунун чолпон жылдыздарынын үй-бүлөсүндө туулган. Атасы Абдубачаев Исмаилбек Москва шаарындагы А.В.Луначарский атындагы театралдык институттун эң алгачкы бүтүрүүчүсү болсо, апасы СССРдин эл артисти, Токтогул атындагы Мамлекеттик сыйлыктын ээси Даркүл Күйүкова.
Б. Бейшеналиева атындагы Кыргыз мамлекеттик искусство институтун аяктаган соң, 1984-жылы Рысбек Исмаилбекович А. Малдыбаев атындагы Кыргыз улуттук опера жана балет театрына солист болуп кабыл алынган.
Рысбек Абдубачаев өзүнүн чыгармачылык жолунда сахнада Фигаронун (“Севильский цирюльник”), Жоробектин (“Аста секин, колукту!”), Ажыбайдын (“Ай-чүрөк”), Онегиндин (“Евгений Онегин”), Карнеронун (“Цыганский барон”), Дон Жуандын (“Дон Жуан”) жана башка көптөгөн мыкты образдарды жараткан.
Чын ыкластуулугу менен өзгөчөлөнгөн, анын аткаруучулук манерасы камералык музыканы сүйүүчүлөрдүн коомчулугунда кеңири таанымал. Рысбек Абдубачаевдин репертуары кыргыз элдик ырларга, романстарга, классикалык чет элдик жана орус вокалдык чыгармаларга бай.
Мурдагы Союздун шаарларында өткөн кыргыз искусствосунун декадаларында, Кыргызстандын эң алыскы аймактарында анын эл алдына чыгуулары чоң ийгиликтерди жараткан. Акыркы жылдары Рысбек Абдубачаев дүйнөлүк жана улуттук классиктердин чоң репертуарын аткаруу менен театрдын академиялык хорунда эмгектенип келген.
Кыргыз Республикасынын маданият, маалымат, спорт жана жаштар саясаты министрлигинин жамааты, театр жана музыка коомчулугу маркумдун үй-бүлөсүнө, жакындарына, туугандарына терең кайгыруу менен көңүл айтып, аза кайгысын тең бөлүшөт.
Маркумду акыркы сапарга узатуу зыйнаты, 24-сентябрда саат 09-00дө Сүөркулов көчөсү, 6а дареги боюнча өтөт.