Бүгүн, 27-сентябрь күнү Бишкектин Д.Өмүрзаков стадионунда жаштар арасында 2025-жылкы Азия Кубогунун тандап алуу оюндарынын алкагында Кыргызстандын футбол боюнча жаштар курамасы Түркмөнстанга каршы ойнойт, деп билдирди Кыргыз футбол биримдиги.
Маалыматка караганда, Мирлан Эшеновдун жетекчилиги алдындагы Кыргыз Республикасынын жаштар курама командасы «I» тайпасында Мьянма, Түркмөнстан жана Жапония командалары менен бирге жайгашкан. Турнирдин биринчи туру алкагында курамабыз 25-сентябрда Мьянманы 2-0 эсебинде жеңди.
«Тандап алуу оюндарга жалпысынан 10 тайпага бөлүнгөн 45 курама команда катышууда. Азия биринчилигинин финалдык бөлүгүнө тайпанын жеңүүчүсү жана тайпада эң мыкты көрсөткүчтөр менен экинчи орунду ээлеген беш курама жолдомо алышат»,- деп айтылат маалыматта.
Түркмөнстанга каршы оюн саат 20:00 старт алып, ал эми футбол күйөрмандарын саат 18:00 баштап, «Freeman 996» атактуу ырчысынын катышуусундагы шоу-программа күтөт.
«Стадионго келип, жаш оюнчуларыбызды башкы континенталдык турнирге жолдомого болгон күрөшүндө колдоңуз»,- деп айтылат Кыргыз футбол биримдигинин билдирүүсүндө.