Жалал-Абаддын «Мурас Юнайтед» клубунун мурдагы машыктыруучусу Вячеслав Левчук Кыргызстандын футбол боюнча курамасынын жана «МЮнун» мурдагы оюнчусу Мирбек Ахматалиев менен аталган клубдун легионер оюнчусу Евгений Терзинин мушташы боюнча айтты. Бул тууралуу «Спорт АКИпресс» жазды.
Аталган окуя болгон учурда «МЮну» Вячеслав Левчук башкарып жаткан.
«Дароо айтышым керек, команда башкарууга жөндөмдүү болчу. Чынында эле башкарууга жөндөмдүү эле. Баары жакшы, баары жайында болгон. Ардайым иш жөнүндө адекваттуу сүйлөшүүлөр болчу. Жогоруда айтылып жаткандар менин «Мурастагы» биринчи машыгууларды баштаган учурдагы иштер эле. Андан кийин эмне болду?.. Бул окуя баарын нес абалда калтырды. Бул окуя адамды мончодон музга ыргыткандай болду.
«Абдыш-Атага» каршы оюнга даярданып, стандардык кырдаалдарда кандай кыларыбыз боюнча машыгып жатканбыз. Стандарттардан дарбазага гол киргизүү боюнча Мирбекте бир аз көйгөйлөр болуп жатты. Тепкен тобу дарбазага кирбей, дарбазанын жанынан өтүп жатты. Бул жагдайды түшүнүшүңөр үчүн айтайын, ал улуттук кураманын оюнчусу эле. «Абдыш-Ата» менен ойногондон кийин ал улуттук курама менен даярдык оюндарына бармак. Албетте, анда кыжаалатчылык бар эле. Мирбек «МЮга» «Абдыш-Атадан» келген. «МЮга» келгенден кийин пенальтиден бир гол киргизип, коопту учурларда өзгөчөлөнө алган эмес. Анан машыгуу учурунда шылдыңдашат. Ал: «Женя, тынчтан, болду жетет» деп бир айтат, эки айтат, үч айтат… Женя дагы тамашалайт. А Мирбектин каны кайнап турган учур, андай учурду өзүңөр түшүнөсүңөр да. Бах… ошону менен бүттү. «Чаң-тополоң» башталып, баары абалды жөнгө салууга аракет кылып жатышты. Мен да дароо эле машыгууну токтоттум. Карасам эки футболчу бири-бирине кол берип, өз алдынча сүйлөшүп жатышыптыр. Түшүнбөстүктөр ошол жерде эле жоюлган. Женянын жаагы сынып калат деп эч ким ойлогон эмес.
Мушташтан кийин Мирбекти өзүмө чакырып, эмне болгонун сурап, ага айттым: «Мирбек, эмоцияга алдырбаш керек. Адам эмоциясын көзөмөлдөп жүрүш керек» деп. Бирок, убакытты артка кайтара албайсың. Дагы бир жолу айтам: машыгууга чейин эч кандай уруш-жанжал болгон эмес. Эч ким эч эчкимди маскарлаган эмес. Машыгуу учурунда бири-бирин «тамашалаган» учурлар абдан көп болгон. Адамдар мушташып, бири-биринин кашы-көзүн жарган окуялар көп болгон. Бирок, эч кимди коллективден чыгарышкан эмес. Анан эле бул окуя болуп кетти.
Ал окуядан кийин биз «Абдыш-Ата» менен ойноп, ири эсепте жеңилип калдык. Анан бул окуя кошумча себеп болду. Андан ары «МЮнун» администрациясы мени менен кош айтышууну каалашты»,- деген Вячеслав Левчук.