USAIDдин «Агросоода» долбоору кыргызстандык дыйкандарды жана айыл чарба ишканаларын колдойт. Алардын бири Ноокат Алмасы» мөмө-жемиштерди жана жаңгактарды өндүрүү жана сатуу кооперативи. Кооператив жергиликтүү дыйкандардан алмаларды сатып алып, сактап, сатуу менен бирге аларды сапаттуу көчөттөр менен да камсыздайт. Мындан тышкары, «Ноокат Алмасы» түшүм жыйноодон кийинки кайра иштетүү, өндүрүмдүүлүктү жогорулатуу жана өсүмдүктөрдү коргоо боюнча кеңештерин берип, окууларды жана семинарларды өткөрөт.
2023-жылдын 14-март күнү USAID «Агросоода» долбоору жана «Ноокат Алмасы» кооперативи Ош облусунун Ноокат районунда муздаткыч кампасы менен заманбап соода-логистикалык борборду түзүү боюнча гранттык келишимге кол коюшкан. USAIDдин гранттык колдоосу алманын кошумча нарк чынжырчасын чыңдоого, бак-дарактарга туура кам көрүү жана түшүм жыйноодон кийинки туура дарылоо ыкмаларын жайылтуу аркылуу фермерлердин өндүрүмдүүлүгүн жогорулатууга жана алманын сатуу көлөмүн көбөйтүүгө багытталган.Кооператив логистикалык борбордун курулушун ийгиликтүү бүтүргөндөн кийин, USAIDдин «Агросоода» долбоору «Ноокат Алмасы» кооперативине 7 миллион сомдон ашык ($78,400) муздаткыч жабдууларын берген.
«Сыйымдуулугу 1200 тоннаны түзгөн бул заманбап муздаткыч кампа жергиликтүү алмаларды жана мөмө-жемиштерди узак мөөнөткө сактоого жана дыйкандарга өз продукцияларын пайдалуу мезгилдерде жогору баада сатууга шарт түзүп, базарды туруктуу кармоого, жыл бою азык-түлүк менен үзгүлтүксүз камсыздоого мүмкүндүк берет. Муздаткыч кампанын алкагында кооператив 200дөн ашуун жаңы жумуш орундарын түзүп, 300дөн ашык фермерди алдыңкы агротехнологияларга үйрөтөт. Бул фермерлерге сатуу көлөмүн көбөйтүү жана жаңы рынокторго чыгуу үчүн жаңы мүмкүнчүлүктөрдү ачат, ошондой эле аймактагы азык-түлүк коопсуздугун жогорулатууга жана фермерлердин жашоо деңгээлин жакшыртууга өбөлгө түзөт»,- деп айтылат маалыматта.
USAIDдин «Агросоода» долбоору кыргызстандык дыйкандарды жана айыл чарба ишканаларын колдоп, Өзбекстан менен соода байланышын кеңейтүү аркылуу Кыргыз Республикасында жумуш орундарын көбөйтүүгө багытталган. Кооператив «Ноокат Алмасы» мөмө-жемиштерди жана жаңгактарды өндүрүү жана сатуу менен алектенип, 15 гектар аянтты ээлеген интенсивдүү алма багын башкарат.