Осмон Саткеев эгемендек кезге чейинки борборлоштурган, пландуу экономикадан базар экономикасына өтүп, өлкөнүн экономикалык абалы жеке менчикке негизделип, товарлар менен кызмат көрсөтүүлөрдөгү баалары эркин кое берилип, базарларда атаандаштык пайда болуп, экономика бир аз да болсо өсүштөр болгонун белгиледи.
Совет доорундагы колхоз же буга чейинки кооперативдерден түп тамырынан өзгөчөлөнгөн, бирок, совет доорундагы экономиканы уюштуруу жана башкарууда жетишилген ийгиликтүү тажрыйбалар менен базар экономикасынын механизимдерин жана дүйнөдө болуп жаткан процесстерди (ааламдашуу, малымат-байланыш технологияларынын өнүгүүсүн, нанотехнологияны ж.б.) эске алуу менен айкалышкан (симбиоз) модели. Бул мурункудай ишкерлерди бир системага бириктирип башкаруу максатында эмес, ишкерлердин өз алдынчалыгын сактоо менен бирге аларга ылайыктуу шарттарды түзүп, керектүү кызмат көрсөтүү максатында уюшулган тейлөө кооперативдик уюм экенин билдирди.
Осмон Саткеев, экономист, “Тейлөө кооперативи – ишкердиктин бешиги” китебинин жана үчүнчү миң жылдыктын дүйнөлүк валюталарынын каталогунун автору, коомдук ишмер.
-Урматуу Осмон мырза, азыркы сиз сунуштап жаткан долбоордун муктаждыктары эмнеде?
-Өткөн эгемендиктин 33 жылында өлкөбүздүн, ал тургай, жалпы региондун саясий, социалдык, экономикалык абалдары түп тамырынан өзгөрүлдү. Республикабыздын эгемендигинин негизги өнүгүү багыттары катары саясатта – демократияны, эл бийлигин андан ары өркүндөтүнү, экономикада – базар (рынок) экономикасына багыт алынган. Өлкөбүздүн экономикасын борбордошулган пландуу экономикадан базар (рынок) экономикасына транцформациялоо мурдагыдан өзгөчө, белгисиз, жер-жерлерде криминалдашкан шарттарда, караңгыда жол издеген жолоочудай, адашыуу, жаңылуу, кайра оңолуу менен коштолду. Ал кездердеги өлкө бийликтери негизинен эгемен мамлекетти түптөө, коомдук-саясий абалын турукташтыруу, өлкө ичинде улуттар аралык конфликтерге жол бербөө, эл аралык конфликтерден, согуштардан сактоо, жаңыдан түптөлүп келе жаткан бизнестерге ыңгайлуу шарттарды түзүү аркылуу экономиканы кризистен алып чыгуу менен алек болушту. Жыйынтыгында, өлкөбүздө негизинен өткөөл учурдун милдеттери ишке ашып, экономикабыз жеке менчикке негизделип, товарлар менен кызмат көрсөтүүлөрдөгү баалары эркин кое берилип, базарларда атаандаштык пайда болуп, экономикабызда бир аз да болсо өсүштөр болду. Анткен менен, бул ийгиликтер колдо бар мүмкүнчүлүктөргө, колдонулбаган резервдерге салыштырмалуу жокко эсе. Мамлекеттик мүлктү тез арада менчиктештирүүнүн, өндүрүш каражаттарын мамлекеттик менчиктен жеке менчикке таркатуу, масштабтуу приватташтыруунун жыйынтыгында биз эл чарбасында майда товар өндүрүүчүлөрдү пайда кылып, экономикабыз чаржайыт, уюштуруу жана башкаруу иштеринде башаламандык түзүлдү. Буга мисал, республикабызла, 2023 жылдын 1 январына жалпы 764 200 юридикалык жана жеке чарбалык субъектер катталган болсо, алардын ичинен 751 640 чарба, жээ 98,36 пайызы жеке менчик чакан, майда чарбаларды (364400 жеке ишкерлер, 356700 дыйкан (фермердик) чарбалар) түзөт. Чакан товар өндүрүүчү жеке чарбалар экономикабыздын басымдуу бөлүгүн түзүп, анын андан ары өнүгүшүнө тоскоол болуп калды. Себеби, чакан жеке чарбалардын өндүргөн продукцияларынын, тапкан кирешелеринин өлчөмдөрү ченелүү, аз болгондуктан, өздөрүн материалдык-техникалык, финансы-кредиттик жана башка ресурстар менен камсыздоодо, өндүргөн продукцияларын сатууда, кайра иштетүүдө талап кылынган муктаждыктарын, ар кимиси өз алдынча чечүүгө аргасыз болуп, көптөгөн кыйынчылыктарга душар болууда. Андыктан, акыркы учурда биригүүгө, кооперацияга барууга муктаждыгы байкалууда. Биригүү, бирге кызматташуу аркылуу биз, өндүрүүчүлөрдү, кайра иштетүүчүлөрдү, өндүрүлгөн продукцияларды сактоочуларды, жеткирүүчүлөрдү, сатуучуларды жана керектөөчүлөрдү бир уюмга бириктирип, колдо болгон ресурстарды рационалдуу, оптималдуу жана эффективдүү колдонууга жетишебиз.
-Бул өткөн совет доорундагы колхоз же азыркы кооперативдерби?
-Жок, бул совет доорундагы колхоз же буга чейинки кооперативдерден түп тамырынан өзгөчөлөнгөн, бирок совет доорундагы экономиканы уюштуруу жана башкарууда жетишилген ийгиликтүү тажрыйбалар менен базар экономикасынын механизимдерин жана дүйнөдө болуп жаткан процесстерди (ааламдашуу, малымат-байланыш технологияларынын өнүгүүсүн, нанотехнологияны ж.б.) эске алуу менен айкалышкан (симбиоз) модели десем жаңылышпайм. Бул мурункудай ишкерлерди бир системага бириктирип башкаруу максатында эмес, ишкерлердин өз алдынчалыгын сактоо менен бирге аларга ылайыктуу шарттарды түзүп, керектүү кызмат көрсөтүү максатында уюшулган тейлөө кооперативдик уюм. Бул бир ынтымакка келип, болгон мүмкүнчүлүктөрүбүздү (потенциал) ачыктап, өзүбүздүн өнүгүү багытыбызды аныктап, биригүүгө (консолидация) баруу, “Жалгыз буудай аш болбойт” демекчи, “Бир жакадан баш, бир жеңден кол чыгарып”, ынтымакка келүү. “Ынтымак бар жерде ырыс бар” деп, өз алдынча уюшуп, өз ара жардамдашуу түрүндө буга чейинки кооперативдик формадан жогорку деңгээлдеги кызматташууга (кооперацияга), баштапкы товар, кызмат өндүрүүчүдөн тартып акыркы керектөөчүгө чейин биригүү демекчимин.
-Биригүү кандай формада жана негизде болуш керек?
-Кооперативке биригүү ыктыярдуулук принцибинин негизинде жүргүзүлгөн, башкача айтканда, каалаган жашы жеткен, жөндөмдүү, кооперативдин уставын тааныган, уставдык фондко уставда каралган өлчөмдөгү пайлык салымын кошкон жаран мүчө болуу жана каалаган учурда өз ыктыяры менен мүчөлүктөн чыгуу укугуна ээ болот. Кооперативди башкаруу демократия принцибинин негизинде жүргүзүлөт. Кооперативди башкарууга ар бир кооперативдин мүчөөсү шайлоолордо бир добушка ээ болуп, добуш берүү аркылуу, кооперативдин башкаруу жана текшерүү органдарын шайлоого жана аларга шайлануу укугу, кооперативдин иши менен байланышкан сунуштарды киргизүү, кооперативдин ишин көзөмөлдөө, текшерүү аркылуу жүргүзө алат. Бул жерде өзгөчө белгилей кетчүү нерсе, баардык кооперативдин мүчөөлөрү уставдык фондко салган үлүшүнүн, пайларынын өлчөмүнө карабастан, бирдей, тең укукка ээ болуп, башка, “капитал бийлигинен” түп тамыры менен айырмаланат. Башкаруу органдары кооперативдин мүчөлөрүнүн жалпы чогулушунда шайланып, алардын алдында уставда каралган мөөнөт, шарттарда отчет берип туруу милдети каралган.
-Тейлөө кооперативдерин кай жерлерде, качан уюштуруу күтүлүүдө жана жыйынтыгында кандай ийгиликтерге жетишебиз?
-Өлкөдө түзүлгөн социалдык-экономикалык жана саясий кырдаал бул иш-чараны кечиктирүүгө жол бербейт. Бул иш-чараны тез аранын ичинде (жарым жыл, бир жыл арасында), жапа тырмак, эрктүү, масштабтуу, параллельдүү баардык калктуу жайларда (айылдарда, кыштактарда, шаарларда, борбор калаада) бир убакытта сервистик кооперативдерди жана алардын райондук, областык, аягында республикалык союзун түзүү боюнча компаниясын жүргүзүү керек. Тейлөө кооперативдерине биригүү жер жерлерде горизонталдуу, ар бир калктуу жайлардын (жээ бир нече жакынкы аралыктагы кичинекей калктуу жайлардын) калкынын: ишкерлери менен кошо жөнөкөй товар жана кызмат керектөөчүлөрү арасында ыктыярдуу түрдө жүргүзүлөт жана вертикалдуу райондук, областык, республикалык тейлөө кооперативдер союзуна биригишет. Анткени, бир жерде туруктуу жашаган тургундар бир маалыматтык талаада болгондуктан, бирин бири жакшы таанышып, ар биринин жүрүш туруштарын, ишкерлик жөндөмдөрүн жана материалдык мүмкүнчүлүктөрүн жакындан билишип, күнүмдүк турмуш жагдайлары ачык-айкын, чечүүгө муктаж болгон проблемалары жөнүндө убагында кабардар болушуп, жамааттык ынтымак, жоопкерчилик, ишеним аркылуу ар кандай чечимдерди чыгарууга, алардын аткарылышын көзөмөлдөөгө, ыкчам, ийкемдүү жана ийгиликтүү ишке ашырууга мүмкүнчүлүктөрү бар. Республика боюнча тейлөө кооперативдердин баштапкы уюмдарын түзүүнү бир күнгө дайындап, “Айылым алтын бешигим” деген девиз менен айыл элдерин биримдикке, ынтымакка чакырып, айылдар, аймактар арасындагы атаандаштык маанайды жаратып, уюшкандыкта өткөзүү керек. Бул иш-чараларды өз убагында уюштуруу үчүн эң оболу мамлекеттик аткаруу бийлитин жогорку органдарынын, облус, район, айыл өкмөттөрдүн жетекчилеринин жана жергиликтүү эл арасынан чыккан активдүү, ата мекенчил атуулдарыбыздын жапатырмак, жоопкерчиликтүү, иштиктүү колдоолору керек. Жогоруда айтылгагдарды кортундуласак, тейлөө кооперативине биригүү аркылуу биз биринчиден, жер жерлердеги элибизге тиешелүү болгон табыгий, материалдык — техникалык, финансы-экономикалык, интелектуалдык-эмгектик жана башка мүмкүнчүлүктөрүбүздү (потенциалдарыбызды) ачыктайбыз, тактайбыз; экинчиден, аларды рационалдуу, оптималдуу, эффективдүү пайдалануу, колдонуунун жолун чогуу, ойлорду топтоп (аккумулировать идеи), кеңешип изденүүгө мүмкүнчүлүк түзөбүз; үчүнчүдөн, ачыкталган, такталган мүмкүнчүлуктөрүбүздү толук, натыйжалуу пайдаланыш үчүн уюштуруу иштерин жүргүзүп, керектүү материалдык-техникалык, финансы каражаттары менен камсыз кылуу жолдорун караштыруу, камсыздоо, адистик окуу курстарын, семинар, тренинг, инструкция, консультацияларды өткөрүүгө, уюштурууга жол ачабыз; төртүнчүдөн кооперативдин мүчөлөрүнүн арасында ишмердик мүмкүнчүлүктөрүн активдештирип, кошумча жумушчу орундарын ачууга өбөлгө түзөбүз, стартаптарды колдойбуз; бешинчиден, кооперативдин мүчөөлөрү тарабынан өндүрүлгөн продукцияларды сатуу, кайра иштетүү жолдорун издеп табууну жана уюштурууну колго алабыз; алтынчыдан, аймактагы жалпы жамааттын муктаждыгы болгон социалдык — экономикалык маселелерди чечүүгө мүмкүнчүлүк ачабыз. Бул жөнүндө Тейлөө кооперативи – ишкердиктин бешиги аталышындагы китебимде жана www.servcoop.org электрондук сайтында кеңири баяндалат.