Иллюстрациялык сүрөт
Кечээ, 16-июль күнү кечинде сөөгү Өзбекстан Республикасынын Андижан шаарындагы сайдан табылган келин бүгүн жерге берилет. Бул тууралуу Кара-Суу районунун Мады айыл өкмөтүнүн Жоош айылынын башчысы Нурмамат Тогузеков билдирди.
Анын айтымында, бүгүн, 17-июль күнү саат 11:00гө маркумдун тажыясы белгиленген.
«Тажыясы саат 11:00гө белгилеген. Бул үй-бүлө 2008-жылы болуш керек, Тээке айылынан көчүрмө болуп, биздин айылдын Тээке участкасына көчүп келген. Маркум аялдын күйөөсү Орусияга барып келип жүрчү. Бул аял өзү базарда соода кылат эле. Жубайлардын 7 баласы бар. Бирок, азыр тажыядан улам канчасы кыз, канчасы уул экенин сурай алган жокмун»,- деди Н. Тогузеков.
ӨКМдин басма сөз кызматы кечээ, 16-июль күнү 1985-жылы туулган Б.А. аттуу жарандын сөөгү Өзбекстан Республикасынын куткаруучулары тарабынан Андижан шаарындагы сайдан табылганын билдирген.
Издөө ишин жүргүзүү боюнча Кыргызстандын Өзгөчө кырдаалдар министрлигинин кайрылуусунун негизинде Өзбекстандын Өзгөчө кырдаалдар министрлигинин куткаруучулары издөө-куткаруу ишин жүргүзүшкөн.
«Маалым болгондой изделип жаткан жаран 14-июль күнү Ош шаарындагы Борбордук базардан сел агызып кеткендиги тууралуу кабарланып, издөөгө алынган»,- деп жазылган билдирүүдө.
14-июль күнү нөшөрлүү жаандан кийин сел кетип, Ак-Буура дарыясынын деңгээли көтөрүлүп, Төлөйкөн айылындагы эс алуучу жайдагы 4 эс алуучу суу агызып кеткен. Алардын сөөгү табылып, баары бир үй-бүлөдөн экени белгилүү болгон.