Улуттук коопсузду боюнча мамлекеттик комитет 14-июль күнү нөшөрлүү жаандан кийини селдин кесепетин жоюу, тиешелүү жетекчилерди жоопкерчиликке тартуу иштеринин алкагында 4 муниципалдык кызматкерге кылмыш иши козголгондугун билдирген.
- «Ош жаңырыгы» мурдараак Ош шаарынын экс-вице-мэри Жасур Азимов, «Кадастр» мамлекеттик мекемесинин Ош шаары боюнча мурдагы башчысы-Отуз-Адыр айыл өкмөтүнүн башчысы Иляз Сансызбаев, Ош шаардык мунипалдык менчик башкармалыгынын мурдагы башчысы Ашимжан Семетеев, Ош шаарынын мурдагы башкы архитектору Алтынбек Токошев УКМК тарабынан кармалып, Ош шаардык соту аларды 18-сентябрга чейин камакта калтырганын жазган.
Атайын кызматтын басма сөз кызматынын маалыматына ылайык, Ош шаарынын Туран кичи районундагы турак үйлөргө келтирилген зыяндын себептерин текшерүүнүн жыйынтыгында, нөшөрлөп жааган жаандын кесепетинен пайда болуучу сел агымынын багыты боюнча жайгашкан жана жашоо үчүн кооптуу жер тилкесин жеке менчикке мыйзамсыз берүү фактысы аныкталды.
Тактап айтканда, козголгон кылмыш ишинин алкагында жооптуу муниципалдык кызмат адамдары: Ош шаарынын экс-вице-мэри А.Ж.М., Ош шаарынын мэриясынын муниципалдык менчик башкармалыгынын экс-башчысы С.А.Э., «Кадастр» мамлекеттик ишканасынын Ош филиалынын экс-башчысы С.И.Б. жана Ош аймактык архитектура жана шаар куруу башкармалыгынын экс-башчысы Т.А.А. кызматтык ыйгарым укуктарын кыянаттык менен пайдаланып, Ош шаардык кеңешинин депутаты И.А.Ш.га Ош шаарынын Туран кичи районунун түштүк тарабында жайгашкан сел сууларын агызуучу каналдын (аянты 2,2 га) жер тилкесин мыйзамсыз алууга жардам берген.
«Жер тилкесин алгандан кийин И.А.Ш. жергиликтүү бийлик органдарынын өкүлдөрүнүн жардамы жана макулдугу менен атайын техниканы колдонуу аркылуу табигый каналдардын түбүн өз алдынча толтуруу жана тегиздөө иштерин жүргүзүп, кийин жеке турак жай курууга сатуу үчүн тегиз жер аянтын курган. Натыйжада, 2,2 га өлчөмүндөгү бирдиктүү жер тилкеси 30 жер участогуна чектөө жол-жобосунан өтүп, алардын ар бирине жеке менчикке укук жөнүндө мамлекеттик акт берилген. Андан ары жеке баюу максатында И.А.Ш. бөлүнгөн жер тилкелерин үчүнчү жактарга сатып, ал жерде учурда турак-жай курулуп жатат.Мындан улам, сел сууларын агызуучу каналдын жоктугуна байланыштуу жаан-чачын учурунда Ош шаарынын Бакыт, Күрөңкеев жана Молодежная көчөлөрүнүн боюнда жайгашкан турак жайларга ири сел агындары келип түшкөн. Натыйжада Туран кичи районуна жакын жайгашкан жеке турак жайларды жана жерлерди, аймакты көрктөндүрүү инфраструктурасын сел алып кетип, жашоочулардын өмүрүнө реалдуу коркунуч жаралган»,- деп айтылат УКМКнын маалыматында.
Жүргүзүлгөн тергөө-ыкчам иш-чаралардын жыйынтыгында жер тилкесин мыйзамсыз чыгарууга тиешеси бар А.Ж.М., С.А.Э, С.И.Б. жана Т.А.А аттуу жооптуу кызмат адамдары кармалып, Ош шаары жана Ош облусу боюнча КР УКМКнын Башкы тергөө абагына киргизилди. Ошол эле учурда Ош шаардык Кеңешинин депутаты И.А.Ш.га издөө жарыяланды.
«УКМК сел жүрүүдөн чоң зыян алып келген жергиликтүү жана мамлекеттик органдардын аракеттеринин мыйзамдуулугун, анын ичинде себептерин жана шарттарын аныктоо боюнча иштерди улантууда»,- деп айтылат атайын кызматтын маалыматында.
И.А.Ш. инциалы менен берилген Ош шаардык кеңешинин депутат Иминджанов Алмаз Шокирович экени айтылууда. Бул маалыматты аталган депутаттын кесиптештери тастыкташты.
