Иллюстративдик сүрөт
Ош шаарында 31-августтан 1-сентябрга караган түнү А. Масалиев кең көчөсүндө жол кырсыгы катталып, эки адам жаракат алып, бирөө ооруканага жетпей каза болду. Бул тууралуу өздүк булактарына шилтеме берип «Турмуш» басылмасы жазды.
Ош шаардык милициянын кайгуул кызматынын басма сөз кызматы, окуя боюнча териштирүү иштери жүрүп жатканын билдирди.
“1-сенябрь күнү саат 03:00 до Ош шаардык ички иштер башкармалыгынын нөөмөт бөлүмүнө Ош шаарындагы А.Масалиев көчөсүндө жайгашкан Ош мамлекеттик университетинин «Бизнес жана менеджмент» факультетинин имаратынын тушунда «Хонда-Фит» үлгүсүндөгү автоунаа жолдун күн чыгыш тарабындагы бетонду сүзгөндүктөн, аталган автоунаадагы 3 адам оор абалда Ош шаардык тез жардам кызматына өткөрүлүп берилгендиги тууралуу маалымат түшкөн.
Аталган маалымат Ош шаардык ички иштер башкармалыгынын кылмыштардын бирдиктүү реестринин маалыматтарды каттоо электрондук журналына катталып, текшерүү иштери башталган. Алгачкы текшерүү иштеринин жүрүшүндө, 2024-жылдын 1-сентябрь күнү болжол менен саат 02:50 чамасында болгон. Азырынча айдоочусу аныктала элек. Натыйжада аталган автоунаага материалдык зыян келтирилип, автоунаада болушкан Ош шаарынын Алай көчөсүнүн 2003-жылы туулган М. Э. (кыз) жашы жете элек 2009-жылы туулган Э. Э. (бала) денесинен жараат алышып ооруканага кайрылышкан. Ал эми Ош шаарынын Кызыл- Кыштак айылынын тургуну 2003-жылы туулган А. А. (кыз) денесинен жараат алып, ооруканага жетбестен каза болгондугу аныкталган. Окуя болгон жерге кароо жүргүзүлүп, чиймелери чийилген жана эксперт криминалист тарабынан видеого жана сүрөткө тартылып алынган. «Хонда-Фит» үлгүсүндөгү автоунаа түндүктү карай жүрүп келген, окуя болгон жерде аталган автоунаанын түндүктү карай 35 м өлчөмдө сүрүлгөн дөнгөлөк издери байкалат. Учурда тиешелүү экспертизалар дайындалып, текшерүү иштери улантылууда”, — деп билдиришти.