Биздин кабарчыбыз алыскы Алай районуна иш сапар менен барган. Анын алкагында райондогу жүргүзүлүп жаткан жумуштар туурасында Алай райондук мамлекеттик администрациясынын башчысы — аким Бапаев Чыңгыз Арстанбекович менен маектешип келген. Сөз башынан болсун.
-Чыңгыз Арстанбекович, Алайга аким болуп келгениңизде кандай көйгөй көзүңүзгө урунду?
-Чындыгында Алай кооз жер экен. Абасы таза, суусу тунук. Ал эми жаратылышына сөз жок. Мен аким болуп келгенимде эле тоолуу аймакта тоют маселеси оор экенин байкадым. Аны чечүүнүн жолун караштырып, Памир-Алай айыл өкмөтүнүн Сары-Таш айылындагы 1000 га жер аянтына сугат суусун тартып келүү иштери жүргүзүлүп, 8,5 км. пайдаланылбай турган канал оңдоп-түзөөдөн өткөрүлүп, сугат жерлерине суу жетти. Эми муну миң кишиге бир гектардан бөлүп берүүнү пландадык. Мунун негизинде тоют көбөйүп, жумушсуздук кыскарып, жарандар пенсияга чыгууга да мүмкүнчүлүк жаралат. Андан кийинки көйгөй суу маселеси экен. Аны да чечүүнүн жолун караштырып, таза суу тартуу иштерин баштадык. Таза суу Тилектеш айыл өкмөтүнүн Аюу-Тапан участкасынан тартылып, жалпы 40 чакырымды түзөт. Бул долбоорду сүйлөшүүлөрдүн негизинде Ас-Сафа кайрымдуулук фонду колго алып, учурда таза суу тартууга старт берилип, иштер жүрүүдө. Буюрса, бул таза сууну тартып келсек, Гүлчөнүн айылынын калкы мурдагыдай 2 саат эмес, 24 саат таза суу менен камсыз болот. Андан да эксперттер суунун составында алтын бар, ден-соолукка пайдалуу деп ырасташты. Алай районунда жалпы 64 айыл бар. Район боюнча калктын таза суу менен камсыз болуусу 86% түздү.
Кошумчалай кетсем, аянты 3 га Гүлчө айылындагы Алымбек Датка жана Курманжан Датка эс алуу паркын толугу менен оңдоп-түзөөдөн өткөрүү иштери башталууда. Ошондой эле, борбордук стадион оңдолууда, айыл өкмөттөрдү техникалар менен камсыздоо жумуштары жүрүп жатат. Таза суу, сугат суу маселелери колго алынган. Жолдор асфальтталып, жарыктандыруу иштери жүрүүдө.
-Ушул жылдын 6 айында курулушу бүткөрүлүп, пайдаланууга берилген жана курулуш жүрүп жаткан обьектилер жөнүндө айтсаңыз?
-Бизде курулуштар дурус эле кулач жайып, учурда жүрүп жаткан иштер да арбын десем болот. Алардын кээ бирине токтоло кетсем, Курманжан-Датка айыл өкмөтүндөгү №24 Арпа-Тектир орто мектеби республикалык бюджеттен курулуп, ушул жылдын май айында пайдаланууга берилди. Ошондой эле, жергиликтүү бюджеттен жана райондук өнүктүрүү фондунан Гүлчө айылындагы Алымбек Датка паркында волейбол аянтчасын калктын керегине тапшырдык. Ал эми курулушу жүрүп жаткан обьектилерге токтолсом, республикалык бюджеттен Гүлчө айыл өкмөтүндөгү №32 Кум-Шоро орто мектебинин 100 орундуу имараты спорт залы менен курулушу башталып, 95 пайыз жумуштары бүткөн. Сары-Могол айыл өкмөтүнүн Гүлбурак балдар бакчасына 140 орундуу имаратын жаңыдан куруу иштери жүрүүдө. Тилектеш айыл өкмөтүндөгү 275 орундуу №27 Ж.Алимов атындагы орто мектебинин имаратын пайдубалы курулууда. Үч-Дөбө-Алай айыл аймагынын Аскалы айылындагы 100 орундуу №14 М.Акматов атындагы орто мектебинин имаратын жаңыдан курулуп жатат, учурда пайдубалын бүткөрүлүп, дубал иштери башталган. Ошондой эле, Үч-Дөбө-Алай айыл аймагынын Чий-Талаа айылына 50 орундуу бала бакчанын курулушу, Курманжан-Датка айыл өкмөтүндөгү Кабылан-Көл айылында кичи футболдук аянтчанын каркасы тургузулган. Азыр бизде билим берүү тармагында мектептердин жана балдар бакчалардын курулуштары старт берген. Андан сырткары жергиликтүү бюджеттен, өнүктүрүү фонддорунан, демөөрчүлөр, инвесторлор тарабынан да ФАП, мейманкана, спорттук комплекстер, парктар курулуп жатат.
-Алай жергесинде туризмди өнүктүрүү кызуу колго алынганы жалпыга маалым. Бул багытта кандай иштерди алып баруудасыздар?
-Туура айтасыз, Алай жергеси туризмди өнүктүрүүгө өтө ыңгайлуу жер. Азыркы учурда Ленин пикти көздөй туристтердин агымы күч алууда. Андыктан турзим десек эле, бир боз үйдү тигип алып, бир чыны кымыз берип, конок күттүк дегенден алыс болуубуз керек. Жакында Памир-Алай айыл өкмөтүнүн Сары-Могол айылында “Тулпар-Көл” муниципалдык эс алуу жайын ачтык. Бул эс алуу жайга чет өлкөлөрдөн келген туристтерди кабыл алууга ыңгайлаштырылган шарттар түзүлүп, учурда конокторду кабыл ала баштады. Андан сырткары, Гүлчө айыл өкмөтүнүн Оро-Дөбө айылына жаңы муниципалдык эс алуу жайы ачылды. Ошондой эле, Оро-Дөбө айылынын Конолго-Чаты участкасынан 5,0 га жер аянтына муниципалдык эс алуу борбору курулуп, 4 боз үй, 4 тапчаны менен тургузулуп, пайдаланууга берилди. Көпчүлүк барган Сары-Ой жайлоосуна АРИС аркылуу электр энергиясы тартылууда.
Маектешкен: Н. Өмүрзакова.