Ош облусунун Араван районундагы Күйгөн-Коро айылынын тургуну кызыл китептеги боз эчкемерди мыйзамсыз өлтүргөн. Алынган маалыматтардын негизинде, шектүү жарандын аракети NABU Кыргызстан уюмунун “Барс-2” тобунун кызматкерлери менен аталган райондун аңчы адиси тарабынан аныкталды, деп билдирди аталган уюмдун басма сөз кызматы.
Маалыматка караганда, аталган факт боюнча акт түзүлүп, эчкемер экспертизага жөнөтүлдү. Анын жыйынтыгы менен бул иш сотко өткөрүлөт. Анда жаранга тиешелүү мыйзамдарга ылайык, 20 миң сомдун 3 эселенген өлчөмүндө айыппул чегерилээри күтүлүүдө.
«Мындан эки эки жыл башта БУУнун Өнүктүрүү программасынын атайын долбоорунун алкагында, Экология жана климат боюнча мамлекеттик комитет Кыргызстандагы боз эчкемерлердин жашоо чөйрөсүн изилдешкен. Анын жыйынтыгында, алардын саны акыркы 25 миң жылдын ичинде эки эсеге кыскарып кеткен деген бүтүм чыгарылган»,- деп айтылат маалыматта.
Боз эчкемерлердин санынын азайып кеткенин – алардын эти менен майы кайсы бир ооруларга дары деген туура эмес түшүнүктөн улам, мыйзамсыз аңчылык кылып кармап, айрым учурларда өлкө ичине жана чет элдерге да сатуу аракети менен түшүндүрүшкөн.
Бул жаныбар Кыргызстандын кызыл китебине киргенине 35 жылдан ашты.