Сүрөт: «Турмуш» басылмасы
Бүгүн, 20-август күнү таңга маал Өзгөн РИИБдин жол кыймылынын коопсуздугун камсыздоо бөлүмүнүн инспекторун белгисиз унаа койдуруп, качып кеткен. Бул тууралуу «Турмуш» басылмасы Ош облусттук жол кыймылынын коопсуздугун камсыздоо бөлүмүнүн басма сөз кызматына шилтеме берип жазды.
“20-август күнү саат 08:00 чамасында Өзгөн районунун Ленин көчөсүндө Өзгөн райондук ички иштер бөлүмүнүн имаратынын алдынан ак түстөгү «Лексус 407» унаасынын айдоочусу Өзгөн райондук ички иштер бөлүмүнүн жол кыймылынын коопсуздугун камсыздоо кызматынын кенже инспектору, милициянын прапорщиги Жыргалбек Назаровду унаасы менен койдуруп кеткен. Натыйжада Назаров Жыргалбек денесинен жараат алып, буту сынып, Өзгөн райондук ооруканасына жаткырылган”,- деп айтылат маалыматта.
Айдоочу окуя болгон жерден изин жашырып кеткен, бирок айдоочу Кара-Кулжа районунун Кара-Кочкор айылынан кармалды. Ал 2004-жылы туулган Э.С болуп чыкты.