![Билим гана адамды бийик жана эркин кылат Билим гана адамды бийик жана эркин кылат](https://oj.kg/wp-content/uploads/2024/07/1-1-1024x629.jpg)
№14 Абдулла Тангатаров атындагы интернат-гимназиясынын эмгек жамааты
Өзгөн районунун Куршаб айылында жайгашкан №14-Абдулла Тангатаров атындагы интернат-гимназиясы быйыл 30 жылдык мааракесин белгилеп турган кез. 1994-жылы мурдагы Ленин атындагы жатак-мектебинин базасында 250 окуучуга ылайыкташкан жөндөмдүү, окууга ынтызар окуучулар үчүн интернат-гимназиясы болуп ачылган. Учурда 500 дөн ашык окуучулар билим алууда.
2023-2024-окуу жылынын аягында ЖРТ баллынын негизинде Кыргызстан боюнча 50гө кирген “Алтын сертификат” ээси Индира Мажитова (228 балл), ошондой эле Ош облусу боюнча эң жогорку упай топтоп, 221 балл алган жана “Алтын тамга” артыкчылык аттестатынын ээси болгон Ажар Муктарова, ошондой эле жалпы бүтүрүүчүлөрдүн ЖРТдагы орточо баллы 160 баллды түзгөнү окуу жылынын аягында мугалимдер жамаатын, ата-энелерди, аймакты кубанычка бөлөштү. Бул сыяктуу ийгиликтер гимназиябыздын мааракесине карата белек болду.
“Алтын тамга” артыкчылык аттестатынын ээси Муктарова Ажар:
![Билим гана адамды бийик жана эркин кылат](https://oj.kg/wp-content/uploads/2024/07/photo1720505209-642x1024.jpeg)
“Биз билимдүү болууга, мамлекеттин өнүгүүсүнө салым кошууга милдеттүүбүз. Эмне үчүн өнүккөн мамлекеттердей шарттар биздин өлкөбүздө түзүлбөш керек? Ал үчүн билимдүү коом, компетенттүү, күчтүү кадрлар керек! Ооба, окуучулардын көпчүлүгүнүн окуган маалыматтары эстен чыгып калды же качан гана мугалимдер тапшырма берген кезде аткарууга киришет. Мындай жүрүп олтуруу менен ийгиликке жетүүгө болбойт. Ал үчүн тынымсыз өтүлгөн темаларды бышыктап, өз алдынча билим алуу жана достор менен татаал тапшырмаларды чыгарып көрүү зарыл. Ошондой эле, эч качан билим алууну токтопоо керек! Азыр заман өнүгүп, билим алуунун түрлүү жолдору чыкты. Мисалы; Ютуб каналдан аудио китептерди угуу менен да алда канча маалыматтуу боло алабыз”,-деди ал.
“Алтын сертификат” ээси Индира Мажитова:
![Билим гана адамды бийик жана эркин кылат](https://oj.kg/wp-content/uploads/2024/07/photo1720505209-1-642x1024.jpeg)
“Окуу, окуу жана окуу”- талыкпаган эмгек. Негизи так, туура максат коюу жана ал максатка кичинеден кадам таштап жетүү, дайыма аракетте болуу «,-деди ал.
Акыркы үч жылдагы предметтик олимпиаданын көрсөткүчтөрү:
Окуу жылы | облустук этап | республикалык этап | республикалык этапка катышкан окуучулардын аты-жөнү |
2021-2022 | 6 окуучу | 2окуучу | Талипов Азамат- англис тили предмети Кубанычбек кызы Алтынай- кыргыз тили предмети |
2022-2023 | 6 окуучу | 1 окуучу | Муктарова Ажар- химия предмети |
2023-2024 | 10 окуучу | 2 окуучу | Исраилов Арлен- физика предмети Жакыпов Канжар- география предмети |
Мыкты мугалим гана мыкты окуучуну тарбиялай алат
Талыкпай изденип, эмгектенген жамаатта Кыргыз Республикасынын эмгек сиңирген мугалими, физика мугалими Калбү Матураимова , 11 Билим берүүнүн мыктысы, 5 билим берүү программаларынын улуттук тренерлери жана өз кесибин сүйүп, «балдарга таалим-тарбия берүү жашоомдогу негизги миссиям».- деп эсептеген мекенчил мугалимдер эмгектенип келет.
![Билим гана адамды бийик жана эркин кылат](https://oj.kg/wp-content/uploads/2024/07/mars7093-1024x683.jpg)
Мыкты класс жетекчилер
Гимназиябыздын мындай ийгиликтерине, албетте, гимназиянын алгачкы директору Каныбек Эшматов агайдын, андан кийинки директор Каримова Айчүрөк эжекенин зор эмгектери бар экендигин айтпай коюуга болбойт. Мугалимдердин кесиптик чеберчилигин өстүрүүдө гимназияда атайын насаатчы мугалимдер тарабынан педагогикалык өнөркана уюштурулуп, анда окутуунун алдыңкы технологиялары, дүйнөлүк билим берүүдөгү жаңылыктар, дегеле билим берүүгө тиешелүү маалыматтар боюнча семинар-тренингдер уюштурулуп турат.
![Билим гана адамды бийик жана эркин кылат](https://oj.kg/wp-content/uploads/2024/07/mars7196-683x1024.jpg)
«Жылдын мыкты мугалим-2024» наамынын ээси Азирет Заидов
2023-2024- окуу жылында “Санарип Академиясы” тарабынан уюштурулган “Санарип мугалим” сынагына 3 мугалим катышып, байгелүү орундарга жетишип, баалуу сыйлыктарга ээ болушту. “Мугалим” илимий-педагогикалык журналы тарабынан өткөрүлгөн “Мыкты класс жетекчи”сынагына Нуржамал Жанибекова эжеке катышып, алдыңкы орунга чыгып, Ташкент шаарына жолдомо алды. “Жылдын мыкты мугалими-2024” кароо сынагында аймактык, райондук, облустук турларда гимназиянын тарых мугалими Азирет Заидов 1-орунду багындырды. Жалпы мугалимдерди ийгиликтери менен куттуктайм!
Отуз жылдык тарыхында гимназия миңдеген ийгиликтүү бүтүрүүчүлөрдү уясынан учуруп, күчтүү инновациялык багытта иш алып барган педагогикалык корпусту түзө алды. Негизги максаты: окутуунун инновациялык усулдарын колдонуу менен окуучунун билим сапатын жогорулатуу, турмуштук көндүмдөрдү калыптандыруу, билим берүү стандартынын аткарылышын камсыздоого болгон билим берүү мекемесинин мугалимдери окутуунун алдыңкы натыйжалуу ыкмаларын, заманбап технологияларды максаттуу пайдаланып, билим берип келишет. Гимназиянын жоон топ бүтүрүүчүлөрү коомго, мекенге кызмат кылып, алар Кыргызстанда эле эмес, дүйнөнүн төрт бурчунда ар кандай тармактарда эмгектенип келишүүдө.
![Билим гана адамды бийик жана эркин кылат](https://oj.kg/wp-content/uploads/2024/07/mars7085-683x1024.jpg)
Арлен Исраилов — физика предмети боюнча республикалык турдун катышуучусу
«Китептер — акылмандыкты арбыткан шайман».- дегендей биздин гимназиябыздын китепкана фондунда жалпы 5 миң 580 китеп бар, анын 2,5 миңин окуу китеби түзөт, ал эми калган китептер көркөм адабий, методикалык, окуу программалык ж.б.у.с. китептерден турат. Ар жыл сайын китепкананын фондун байытуу, гимназисттерге жаңы, ары зарыл болгон китептерди камсыз кылуу максатында атайын демөөрчүлөр, мыкты бүтүрүүчүлөр камсыздап турат. Быйылкы окуу жылында “Бир адамдан бир китеп” акциясынын алкагында китепкана фонду 540 китеп менен толукталды. Андан тышкары быйылкы 20 жылдык бүтүрүүчүлөр тарабынан китепканага 50 миң сомдук ARCUS басмаканасынын окуучуларга керектүү окуу китептери менен толукталды.
“Коопсуз мектеп” долбоорунун алкагында гимназияга 41 даана видеокөзөмөл кайтарым байланышы менен коюлуп, коопсуздук маселесин чечүүгө жакшы шарт түзүлгөн. Ага удаа эле улуттук баалуулуктарды, нарктуулукту чагылдырган музыканын ыргагы менен тыныгуулар болот. Инновацияык технологиянын каражаттарын заманбап окуучуга керектүү болгон көндүмдөрдү калыптандыруу үчүн да колдонулат. Быйылкы 20 жылдык бүтүрүүлөр гимназиябызга 3 панелдик акылман доска алып берди ( жалпы баасы: 450 миң сом). Албетте, бул бүтүп кеткен бүтүрүүүлөрдүн учурдагы билим берүү жараянын жакшыртууга кошкон үлкөн салымы!
![Билим гана адамды бийик жана эркин кылат](https://oj.kg/wp-content/uploads/2024/07/mars7084-683x1024.jpg)
Канжарбек Жакыпов- география предмети боюнча республикалык турдун катышуучусу
Заманбап мектепти заманбап мугалимдер түзөт. Ал эми алардын жемиши да заманбап окуучулар болуп, ааламдашуу процессинде керектүү көндүмдөргө ээ болгон кадрларды тарбиялайт. Дал ушул өңүттөн алганда биздин гимназия “Акылдуу мектеп” долбоорунун алкагында Edupage платформасын иштетип жатканыбызга 5 жылдын жүзү болду. Аталган платформада мугалимдердин календардык пландары, сабактын күнүмдүк пландары камтылып, ошол эле учурда окуучуларга үй тапшырмаларды жөнөтүлөт. Ошондой эле, ар бир мугалим окуучулардын ата-энелери менен кайтарым байланыш жасоого болот. Гимназия толук кандуу электрондошкон, заманбап, ары инновациялык билим берүү мекемеси катары иш-тажрыйбасын жайылтып да келүүдө. Учурда Билим берүү жана илим министирлиги тарабынан иштелип чыккан “Электрондук мектеп” платформасына өтүү этабы жүрүп жатат.
![Билим гана адамды бийик жана эркин кылат](https://oj.kg/wp-content/uploads/2024/07/photo1720505210-1-768x1024.jpeg)
Элмира Кеңешбаева, №14 Абдулла Тангатаров атындагы интернат-гимназиясынын директору
Ал эми жогорку окуу жайлар менен тыгыз кызматташуунун негизинде да бир канча алгылыктуу иш-аракеттер көрүлүп келүүдө. Алсак, ОшМУнун алдындагы Конфуций институту менен кытай тили сабак катары киргизилип, окутулуп баштады. Казакстандын Назарбаев университетинин профессору Дүйшөн Шаматов, Ала-Тоо эл аралык университетин профессору Элира Турдубаева жана ОшМУнун, АУЦАнын окуутучу-профессордук курам менен бир нече илимий долбоорлор боюнча тыгыз иш алып барылган. Жыйынтытап айтканда, №14 Абдулла Тангатаров атындагы интернат-гимназия илимий сабаттуу, жаңылыктарга ар дайым даяр, инновациялык билим берүү менен заманбап мектепте XXI кылымда окуучуларга керектүү көндүмдөрдү берүү менен биргеликте улуттук баалуулукту, нарктуулукту, Мекенге болгон сүйүү менен кең келечектүү Кыргыз Респбликасы үчүн мекенчил окуучуларды жетилтүүдө жигердүү ишмердүүлүгүн тынымсыз жумшай бермекчи.
Автор: Элмира Кеңешбаева, №14 Абдулла Тангатаров атындагы интернат-гимназиясынын директору
Окуучуларга ар дайым ачык асман, ачык жол, ийгиликтердин изги жолунда болгула…
Ийгилик болсун, мыкты гимназия!