УКМК тарабынан «Кызмат абалынан кыянаттык менен пайдалануу» беренеси боюнча айыпталган Кара-Суу райондук администрациясынын мурдагы башчысы Тилек Матраимовго Ош облустук соттук коллегиясынын чечими чыкты.
Буга чейин Тилек Матраимовдун иши тергөөдөн Ош шаардык сотуна өтүп, Ош шаардык соту Кара-Суу райондук сотуна жиберген. Натыйжада Кара-Суу райондук сотунун чечими чыгып, райондук соттун 2024-жылдын 11-июндагы өкүмүнүн негизинде М.Т.И. КР Кылмыш-жаза кодексинин 337-беренесинин 3-бөлүгү менен күнөөлүү деп табылып, 3 (үч) жылдык мөөнөткө мамлекеттик жана муниципалдык кызматтарды ээлөө укугунан ажыратуу менен 1 000 000 (бир миллион) сом айып салынган. Тилек Матраимов тарап райондук соттун чечими менен макул болбой, апелляциялык арыз жазган.
Ош облустук сотунун маалымат кызматы бүгүн, 14-август күнү кабарлагандай, Ош облустук соту төмөнкүдөй чечим чыгарган.
Ош облустук сотунун 2024-жылдын 6-августундагы өкүмүнүн негизинде КР Кылмыш-жаза кодексинин 337-беренесинин (Кызмат абалынан кыянаттык менен пайдалануу) 3-бөлүгү (Ушул берененин 2-бөлүгүндө каралган, этиятсыздыктан оор залал келтирген жосун, — 10000ден 20000 эсептик көрсөткүчтөргө чейин айып салууга же мүлкүн конфискациялоо менен, үч жылга чейинки мөөнөткө белгилүү бир кызмат ордун ээлөө же болбосо белгилүү бир иш менен алектенүү укугунан ажыратуу менен беш жылдан сегиз жылга чейинки мөөнөткө эркиндигинен ажыратууга жазаланат) менен айыпталуучу М.Т.И. карата Кылмыш-жаза кодексинин 79-беренесинин (Күнөөсүн мойнуна алуу жөнүндө келишим түзүлгөн учурда жазаны дайындоо) 1-бөлүгүн (Адам күнөөнү мойнуна алуу боюнча келишим түзгөндө жана келтирилген материалдык зыянды толугу менен төлөгөндө, сот адам күнөөлүү деп табылган беренеде каралган жазанын минималдуу өлчөмүнүн чегинде эркиндигинен ажыратууга байланышпаган жазаны дайындайт. Эгерде берененин санкциясында эркиндигинен ажыратууга байланышпаган жазалар жок болсо, адамды күнөөлүү деп тапкан берене менен каралган эркиндигинен ажыратуу түрүндөгү жазанын эң төмөнкү мөөнөтүнүн жарымынан аз эмес мөөнөткө дайындалат.)колдонуу менен 3000 (үч миң) эсептик көрсөткүчтүн өлчөмүндө айып салууга, башкача айтканда мамлекеттин пайдасына 300 000 (үч жүз миң) сом өндүрүлүүсү белгиленген.
«Облустук соттун өкүмүнө нааразы тарап Кыргыз Республикасынын Жогорку сотуна кассациялык тартипте даттанууга укуктуу»,- деп айтылат маалыматта.
Ал эми Ислам жана Руслан Матраимовдордун иши тергөөдөн Ош шаардык сотуна өтөт элек.
Буга чейин УКМК үч бир тууган Матраимовдор-Тилек, Ислам, Русландар кармалганын билдирген. Ушул жылдын 27-мартында Ош шаардык соту алардын баш коргоо чарасын карап, Тилек Матраимовду 1 айга, Ислам, Руслан Матраимовдорду 2 айга камакта калтырган.
Ушул жылдын 26-апрелинде Ош шаардык сотунун тергөө судьясы УКМКнын Ош облусу жана шаары боючна башкармалыгынын тергөөчүсүнүн өтүнүч карап, Тилек Матраимовду үй камагына чыгарган.