Коомдук тартипти жана коопсуздукту бузууга алып келе турган чагымчыл маалыматтарды таратып, коомдук тартипти бузгандарга карата мыйзамдын чегинде чаралар көрүлөт. Бул тууралуу Ош ОИИБдин басма сөз кызматы билдирди.
Маалыматка караганда, УКМКнын Ош шаары жана Ош облусу боюнча Башкы башкармалыгынын жана Ош ОИИБдин Экстремизмге жана мыйзамсыз миграцияга каршы аракеттенүү боюнча кызматынын кызматкерлери Интернет мейкиндигинде мониторинг жүргүзүү учурунда “WhatsApp” месенджеринде “Айдоочулар” коомунун өкүлдөрүнүн бири “Кытай-Кыргызстан-Өзбекистан” жолу менен жүргөн жүк ташуучу автоуналардын айдоочулары арасында ар кандай мыйзамсыз чакырыктарды жана массалык башаламандыктарды уюштурууга аракет жасап жаткандыгы маалым болгон.
«Аталган факты боюнча Кылмыш-жаза кодексинин 327-беренесинин 2-бөлүмүнүн 1-пункту (Бийликти күч менен басып алууга ачык чакырыктар) менен иш козголгон. Жогорудагы көрсөтүлгөн кылмыш ишинин алкагында ыкчам-иликтөө иш-чаралары жүргүзүлүп, “Айдоочу” коомдук бирикмесинин өкүлдөрү 1972-жылы туулган Т.Н., 1957-жылы туулган С.И. жана “Трансордо” бирикмесинин өкүлү 1964-жылы туулган Ч.М. аттуу жарандар аныкталып, тергөө кызматына камсыздалган»,- деп айтылат маалыматта.
Ошондой эле, Кара-Суу райондук сотунун чечими менен Ош ОИИБдин ЭММКАКтын, УКМКнын Ош шаары жана Ош облусу боюнча Башкы башкармалыгынын кызматкерлери аталган жарандардын үйлөрүнө жана иштеген кеӊселерине тинтүү жүргүзүшкөн. Анын натыйжасында Бишкек шаарынын Арча-Бешик конушундагы 1957-жылы туулган С.И.нин жашаган үйүнө тинтүү жүргүзүү учурунда сактоо мөөнөттөрү өтүп кеткен “Тоз-78-15” жана “КМ 7.62Х39” үлгүсүндөгү үч курал табылган. Бул факты боюнча учурда тергөө амалдары жүргүзүлүүдө.
«Жогорудагы жарандар тергөө кызматына камсыз кылынып, суракка алынган соң, шектүү катары кармалган 1957-ж.т. С.И. убактылуу кармоочу жайга киргизилди. Учурда иликтөө иштери уланууда. Ош ОИИБдин, УКМКнын Ош шаары жана Ош облусу боюнча Башкы башкармалыгы жарандарга кайрылып месенджерлердеги, социалдык тармактардагы чагымчыл, жалган материалдарды таратуудан алыс болууга чакырат жана мындай фактылар боюнча ички иштер органдарына-102 телефон номуру аркылуу кабарлап коюну суранат. Мыйзамды билбегендик кылмыш жоопкерчилигинен бошотпойт жана чагымчыл билдирүүлөрдү таратууга тиешеси барлар жоопкерчиликке тартылат»,- деп айтылат маалыматта.