Ош облусунун Кара-Суу районунда тоок ферма ачылып, пайдаланууга берилди. Тоок ферманын ачылуу аземине Министрлер кабинетинин төрагасынын орун басары Бакыт Төрөбаев, облус жетекчиси Эльчибек Джантаев катышып, бул долбоордун облус үчүн маанисин белгилеп, анын ийгиликтүү өнүгүп кетерине ишеним артарын билдирди.
«Жаңы ишканада 22 жумушчу орун түзүлүп, жергиликтүү экономиканын өнүгүшүнө жана калктын иш менен камсыз болушуна маанилүү салым болот. Мындан тышкары, Кара-Суу районунун Отуз-Адыр айылында бир катар олуттуу долбоорлорду ишке ашыруу пландалууда. 2 гектар аянтка 480 чарчы метр тоют даярдоочу цех, 300 чарчы метр аянттагы мал союучу жай, 500 чарчы метр жумуртка инкубациялоочу имарат курулат. Бул объектилер облусттын агроөнөр жай потенциалын бир кыйла чыңдап, калкты жогорку сапаттагы айыл чарба продукциялары менен камсыз кылууга жардам берет»,- деп айтылат Президенттин Ош облусундагы өкүлчүлүгү таркаткан маалыматта.
Тоок жумурткалары маанилүү азык-түлүк продуктусу болуп саналат жана дээрлик ар бир керектөөчүнүн керектөө куржунуна кирет, ошондуктан бул продукт тамак-аш азыктарын сатуучу көпчүлүк чекене соода түйүндөрүндө бар. Ош облусунун тооктун жумурткасына болгон суроо-талапты жана облустун бардык багыттары боюнча продукцияларды жеткирүү мүмкүнчүлүгүн эске алуу менен «ББК Групп» ЖЧКсы өз продукциясын 100% сатууну камсыздай алды.