Бүгүн, 26-август күнү Бабур атындагы драма театрында Ош облусундагы билим берүү кызматкерлеринин август кеңешмеси өттүдө.Аталган кеңешмеге Билим берүү жана илим министри Догдуркул Кендирбаева, Президенттин Ош облусундагы өкүлү Эльчибек Джантаев баш болгон жетекчилер, Дүйшөн Шаматов, Орозали Сайдилканов өңдүү коноктор, окуу жайлардын ректорлору, район акимдери, айыл өкмөт башчылар, Ош билим берүү институтунун кызматкерлери, мугалимдер катышууда.
Август кеңешмеси «Билим берүүгө 100 жыл: трансформация, чакырыктар жана жаңы горизонттор» деген темада уюштурулуп, анда 2023-2024-окуу жылындагы жетишкендиктер, ошондой эле 2024-2025-жаңы окуу жылына карата даярдыктар, тапшырмалар жана милдеттер талкууланууда.
Кеңешмеде Билим берүү жана илим министри Догдуркүл Кендирбаева буларга токтолду.
«Мейли он күн, 100 жыл мурун болсун, баланын келечегин мугалим гана чече алат. Былтыр китеп таппай кыйналдык. Жеке басмаканалар китептерди өтө кымбат баада сунуштады. Китептин баасы социалдык баада болушу керек.
Президент С. Жапаров 2023-жылдын сентябрь айында БУУда сүйлөп, Кыргызстан билим берүү менен туруктуу өнүгөт деп айткан эле. Мына президенттин тапшырмасы менен 12 жылдык окуу системасына өтүп жатабыз.
Биздин алдыбызда абдан көп чакырыктар бар. Биринчи жолу өлкөдө онлайн мектептер ачылды. Мына сырттан окуу тууралуу мектептер бар. Аларга 300 млн сом коротуп атабыз. 5 миңдей окуучусу сырттан окутуучу мектептерде окуйт. Биз кимди алдап атабыз. Бала физикалык жактан мектепте отуруш керек. Эми ал сырттан окуткан мектептерди чакыртып алабыз дагы, онлайн мектептерди ачабыз.
Мына көп иштерди онлайн толтурдуңуздар. Бирок, баарыңар начар толтурдуңар. Окуучулар боюнча справкалар Түндүктө турса, Калкты тейлөө борборунда кагаз справкаларды алып отурдуңар. Ошондуктан, биз ар бир мугалимге бирден компьютер беребиз. Анда бирдиктүү программа бар. Анда мугалимдин квалификациясын жогорулатуу боюнча программалар болот. Анан калса жасалма интеллект — Гугл аналитика менен иштейбиз. Америкага барып, ал программа менен кол коюп келгенбиз.
Ошону үчүн ар бирине ноутбуктарды беребиз. Ал ноутбуктар бүт ыңгайлуулугу менен болот. Техникалык шарттары да каралган ноутбуктар болот.
Азыр сел кырсыгы, глобалдык жылуулук, азык-түлүк коопсуздугу өтө чоң көйгөйгө жаратууда. Мына мурда мөмө берип турган бак азыр климат жылуу болуп жарабай калды. Анткени ысыкка чыдабай жатат. Жерлерге селитра колдоно берип, жерлерди да жок кылып атабыз. Учактан карасаң, жерлер бүт аппак. Мына ушул себептен, ушундай маселелерди чече алган адистерди даярдашыбыз керек. Окуучуларды жаңы чакырыктарга даяр кылып даярдашыбыз керек»,- деди ал.